Тожикистон Қишлоқ хўжалиги вазирлиги 83 944 гектар майдонга чигирткалар тарқалганини маълум қилди. Ҳозирда 67 минг гектар ер майдонига кимёвий ишлов берилди. Чигирткаларга қарши кураш учун ўнлаб техникалар, аэрозол қурилмалар ва бошқа манбалар жалб этилди, деб ёзмоқда Asia-Plus.
Чигирткалар асосан Хатлон вилоятидаги экин майдонларига (55,1 минг гектар) хавф солмоқда.
Қишлоқ хўжалиги вазирлиги қошида бугунги кунда далаларни чигиртка босқинидан сақлаб қолиш учун барча чораларни кўраётган «Чигирткага қарши кураш экспедицияси» фаолият олиб бормоқда.
Бир ой аввал қишлоқ хўжалиги вазири Сулаймон Зиёзода хўжаликларни эҳтимолий чигиртка босқинидан огоҳлантириб, маҳаллий ҳукуматни ҳашаротларга қарши курашишга чақирган эди.
Лекин ушбу ҳашаротларнинг минтақадаги барча мамлакатларда кенг тарқалгани вазиятни мураккаблаштириб, қўшни давлатлар ва халқаро ташкилотлар билан биргаликда ҳаракат қилишни талаб қилмоқда.
2020 йилнинг охирида БМТнинг Озиқ-овқат ва қишлоқ хўжалиги ташкилоти (FAO —Food and Agriculture Organization) билан чигирткаларга қарши курашиш лойиҳасини амалга ошириш тўғрисида шартнома имзоланган эди. Лойиҳа Япония ҳукумати томонидан молиялаштирилмоқда. Шунингдек, чора-тадбирлар кўлами Афғонистон ва Қирғизистонни ҳам қамраб олади.
Лойиҳанинг иккинчи босқичи 2020—2025 йилларга мўлжалланган бўлиб, унга Ўзбекистон, Туркманистон ва Қирғизистон давлатлари ҳам жалб қилинади.
Лойиҳанинг биринчи босқичини амалга ошириш учун Япония ҳукумати Тожикистонга 7,4 миллион доллар ажратди.
FAO’нинг маълум қилишича, ҳатто ўртача катталикдаги чигиртка тўдаси бир ярим йил давомида икки ярим минг кишини боқиш учун етарли бўлган экинларни йўқ қилиши мумкин.
Аввалроқ Япония ҳукумати ва Бирлашган Миллатлар Ташкилотининг Озиқ-овқат ва қишлоқ хўжалиги ташкилоти Марказий Осиёда чигирткага қарши курашни кучайтириш бўйича лойиҳага 7,25 миллион доллар ажратиши ҳақида хабар берилган.
Изоҳ (0)