21-maydan 25-mayga qadar yoshlar uchun keng miqyosdagi tadbir — “Toshkent Besh tashabbus harakati” bo‘lib o‘tadi va uning doirasida 16 yoshdan 30 yoshgacha bo‘lgan yigit-qizlar vokal ijrochilar tanlovi — Tashkent Voice Fest, raqqoslar tanlovi — Tashkent Dance Fest hamda ko‘cha san’atkorlari tanlovi — Street Art’da o‘zini namoyon etishi mumkin. Tadbir tashkilotchisi — Toshkent shahar hokimligi.
Tashkent Voice Fest
Vokal ijrochilarning katta tanlovi Toshkentning eng yaxshi va iqtidorli qo‘shiqchilarini aniqlab beradi. Tanlov qatnashchilari videoarizalar yordamida saralab olinadi. Eng yaxshilar jonli eshituvga taklif qilinadi.Maxsus tuzilgan professional jyuri ijroni uchta mezon bo‘yicha baholaydi — vokal ijro mahorati, artistizm va ijroning badiiy ishonarligi. Qo‘shiqlar istalgan janr va tilda ijro etilishi mumkin.
Hozirga qadar tanlov tashkiliy qo‘mitasiga tadbir saytida mavjud Telegram-bot orqali 100 dan ortiq videoariza kelib tushdi.
“Toshkent Besh tashabbus harakati”ning barcha mehmonlari katta sahnada bo‘lib o‘tadigan hayajonli chorak final, yarim final va final batllari tomoshabiniga aylanish imkoniyatiga ega. Tanlovga mashhur jurnalist va prodyuser Nikita Makarenko rahbarlik qiladi.
Tashkent Dance Fest
Raqs tanlovi Toshkentning barcha ko‘zga ko‘ringan raqqoslarini jamlaydi. Tomoshabinlar Hip-Hop, Dancehall va Break Dance uslubidagi batllar guvohiga aylanadi. Ular yakkaxon hamda jamoa tarzida musobaqaga kirishadi.Tanlov to‘rt bosqichda o‘tkaziladi — onlayn-saralash, raqs asosida saralash, yarim final va final. Ishtirokchilarni saralashda barcha bosqichlarda jyuri raqqosning musiqaviyligi, raqs ijro etish texnikasi va uslubni bilish darajasini hisobga oladi.
Hozirgacha ro‘yxatga olingan ishtirokchilar soni 50 nafardan oshgan. Bu tanlovga taniqli xoreograf Sergey Zlotnikov rahbarlik qiladi.
Street Art
Yosh iqtidorli rassomlar o‘z qobiliyatlarini Street Art — zamonaviy tasviriy san’at tanlovida namoyish etishi mumkin. Hozirgacha tanlovda qatnashish uchun 50 dan ziyod yosh rassomlar o‘z ishlarini yuborishdi.Onlayn saralashdan so‘ng tanlovga sakkiz kishi taklif etiladi va ular tadbir boshlanishga qadar maxsus devorlarda o‘z ijod namunalarini tayyorlaydi. So‘ng tomoshabinlar orasida ovoz berish jarayoni o‘tkazilib, uning yakunlariga ko‘ra g‘olib aniqlanadi.
Street Art — ko‘cha rassomlari tanlovi uchun onlayn-ro‘yxatga olish 10-mayda tugaydi. Vokal ijro va raqs tanlovlari uchun arizalar qabul qilish 15-mayga qadar davom etadi.
16-may kuni jyuri Tashkent Dance Fest ishtirokchilarini onlayn-arizalar asosida saralab oladi. Xuddi shu kuni jyuri videoarizalarni ko‘rib chiqadi va Tashkent Voice Fest saralashining ikkinchi bosqichiga o‘tishi mumkin bo‘lgan vokal ijrochilarni tanlaydi. Jonli eshituv 17-may kuni bo‘lib o‘tadi.
Tanlovlarga ro‘yxatdan o‘tish tadbirning rasmiy sayti — www.toshkent21.uz’da hamda Telegram-bot yordamida amalga oshiriladi.
“Daryo” — “Toshkent Besh harakat tashabbusi”ning axborot hamkoridir.
Izoh (0)