Jinoyat ishlari bo‘yicha Toshloq tuman sudida bosqinchilik jinoyatida ayblangan to‘rt kishi sud binosidan qochib ketdi, deb xabar beradi “Xabar.uz”.
Nashr manbasining ma’lum qilishicha, sudlanuvchilarning barchasiga dastlabki tergovdayoq qamoqqa olish ehtiyot chorasi qo‘llangan bo‘lib, ular ichki ishlar organi xodimlarining kuzatuvi va nazoratida sud majlisiga olib kelingan. Shunga qaramay, og‘ir jinoyatda ayblanayotgan fuqarolar binoning yerto‘la qismidagi orqa devordan oshib qochib ketgan.
“Ayblanayotganlarning ikki nafari aka-uka ekani aytilmoqda. Yana ikki nafari muqaddam bir necha marta sudlangan shaxslar ekani aniq”, — deyiladi xabarda.
“Xalq so‘zi online”ning Farg‘ona viloyat sudining Jamoatchilik va ommaviy axborot vositalari bilan aloqalar bo‘limi boshlig‘i Qobiljon Mutaliyevga tayanib yozishicha, tezkor chora-tadbirlar natijasida sudlanuvchilar shu kunning o‘zidayoq viloyat hududida ushlangan.
Eslatib o‘tamiz, 2020-yilning oktabrida Nurafshonda voyaga yetmagan bolani zo‘rlashda ayblanayotgan fuqaro sud binosidan qochib ketgandi. Oradan bir kun o‘tgach gumonlanuvchi huquq-tartibot organlari xodimlari tomonidan olib borilgan tezkor qidiruv surishtiruv ishlari davomida qo‘lga olingan edi.
Izoh (0)