Oliy Majlisning Inson huquqlari bo‘yicha vakili qoshidagi komissiyasi IIV Jazoni ijro etish bosh boshqarmasi tizimidagi 22-sonli koloniyada monitoring o‘tkazdi. Komissiya tarkibida bo‘lgan O‘zbekiston inson huquqlari “Ezgulik” jamiyati raisi Abdurahmon Tashanov ushbu koloniyada saqlanayotgan O‘zbekistonning ikki sobiq bosh prokurori — Rashidjon Qodirov va Ixtiyor Abdullayev bilan bo‘lgan uchrashuv tafsilotlarini Facebook’dagi sahifasida yozib qoldirdi.
Qamoqxonada ikki sobiq bosh prokuror bilan gaplashdimKecha (5-may kuni) Oliy Majlisning Inson huquqlari bo‘yicha vakili qoshidagi komissiya tarkibida IIV JIEBB tizimidagi 22-sonli koloniyada monitoring o‘tkazdik.
Milliy prezentiv mexanizm islohoti doirasidagi o‘rganishlarimiz bu safar huquqni muhofaza qilish organlarining sobiq xodimlari jazo muddatini o‘tashi uchun maxsuslashtirilgan koloniyada kechdi. 1200 nafar mahkumni saqlashga mo‘ljallangan mazkur koloniyada hozirgi kunda 273 nafar mahkum jazo muddatini o‘tamoqda.
Koloniyaning boshqa koloniyalardan sharoit nuqtayi nazaridan deyarli farqi yo‘q. Qamoqxonalarga belgilangan standartlar — tibbiyot, o‘quv, ovqatlanish va ishlab chiqarish bo‘limlari tashkil qilingan. Sport mashg‘ulotlari uchun alohida sharoitlar mavjud.Xullas, qamoqxona sharoiti, umumiy ahvol, mahkumlarga munosabat masalasida muammolar ko‘pam ko‘zga tashlanmaydi. Har holda “chest mundira”, “qarg‘a qarg‘aning ko‘zini cho‘qimas” singari beo‘xshov matallarga ergashilsa, bu yerda muammolarning kamligini tushunish mumkin bo‘ladi.
Bu o‘rinda jamoatchilikni ko‘proq qiziqtiradigan manzara borki, shaxsan mening zonaga tashrifim ham, bu postni yozishga undagan jihat ham shudir. Ya’ni, bu yerda jazo muddatini o‘tayotgan yuqori darajadagi mulozimlar — sobiq bosh prokurorlar Rashidjon Qodirov, Ixtiyor Abdullayev, sobiq MXX katta zobiti Javdat Sharifxo‘jayev, bosh prokuror o‘rinbosari Ulug‘bek Sunnatov va Xurramov.
Avval mamlakatimizga uch muddat bosh prokurorlik qilgan Rashidjon Qodirov bilan suhbatlashdik. U kishidan sharoitlar, mahkumlarga muomala haqida so‘radim. Har holda hushyor odam — yaqin bir oyda manzil koloniyaga chiqishini, shikoyatlari yo‘qligini, BMT strukturalariga qiynoqlar bo‘yicha shikoyat qilmaganini, sog‘lig‘i yaxshiligini aytdi. “Yurak bo‘yicha avvalroq sangorodda davolangandik, hozir hammasi yaxshi”, dedi Qodirov.
Ko‘rdikki, sobiq bosh prokuror Rashidjon Qodirov hozirda tikuv sexida ishlamoqda. Uning qo‘lidan chiqqan guldor matolardan tikilgan bejirim ayollar ko‘ylagi, lozimi va boshqa ashyolar ko‘zni quvontiradi. Rasmlarga olishdi, komissiyamiz vakillari hademay bu rasmlarni chop qilsa kerak.General Abdullayevni chinni sexida, idishga naqsh solayotgan jarayonda uchratdim. Ungacha muassasaning tibbiy bo‘limiga kirib, u kishining tibbiy kartasi bilan tanishgandim. Hujjatga ko‘ra, Abdullayev Jinoyat kodeksining 242-moddasi (jinoiy uyushma tashkil etish) va 301-moddasi (hokimiyatni suiiste’mol qilish, hokimiyat vakolatidan tashqariga chiqish yoki hokimiyat harakatsizligi) bilan 16 yilga ozodlikdan mahrum qilingan. Unga nisbatan yaqin orada ikki marta o‘tkazilgan koronavirus testi manfiy chiqqan. Bo‘yin umurtqa pog‘ona qismidagi og‘riqdan shikoyat qilgan. Ko‘zining ko‘rish darajasi birinchi ko‘zda +1 va ikkinchi sohada +2,58.
Tibbiyot qismi shifokorining aytishicha, Abdullayev 2017-yilda Germaniyada ko‘z gavharlarini almashtirish bilan bog‘liq jarrohlik amaliyoti o‘tkazgan. Ya’ni, ko‘z xastaligi tergov yoki zonada orttirilmagan.Sobiq bosh prokurorga uning otasi va o‘g‘li bir qancha OAV orqali jamoatchilik va prezidentga murojaat qilgani, unga nisbatan qiynoqlar qo‘llanilgani va hozirda uni yaqinlari bilan ko‘rishtirishmayotgani, izolyatsiyada saqlanayotgani haqida bayonotlar berishayotganini aytdim. U kishi “hammasi yaxshi bo‘ladi, bu gaplar prezidentimizga yetib borsa, adolat qiladilar”dan nariga o‘tmadi.
Ta’kidlash kerakki, ikki sobiq bosh prokuror ham o‘ta ehtiyotkorlik bilan muomalada bo‘ldi. To‘g‘rirog‘i, komissiyalarning nimaligi, qayergacha bora olishini o‘tmishdagi faoliyati orqali yaxshi biladigan bu mulozimlar vaziyatni murakkablashtirib o‘tirishmadi. Har holda menga shunday tuyuldi.
Sexlardan chiqayotib, sobiq MXX polkovnigi Javdat Sharifxo‘jayev bilan ko‘rishdim. U gapni qisqa qilib, hech qanday shikoyati yo‘qligini ta’kidlagan holda qochib qoldi...
Umuman, koloniyadagi manzara meni qoniqtirdi. Masalan, siyosiy ahamiyatga molik bo‘lgani uchun bosh prokurorlarga alohida mulozamat yoki kuzatuv yo‘q. Alohida osh-ovqat ham ajratilmagan. Ko‘pchilikka nima bo‘lsa, shu.
Koloniyaning kattagina qismi ta’mirda ekan. Oshxonadagi osh-ovqatlar yomonmas. Kutubxona, sport zallari va zerikib qolmaslik va pul topish uchun tashkil qilingan sexlar shular jumlasiga kiradi.
G‘alatiroq taassurotlar bilan qaytdim. Bir paytlar u bilan suhbatlashish, so‘roqqa tutish tugul oldiga bora olmaganimiz bu odamlar bugun mahzun, avvalgi salobatdan asar ham yo‘q...2000—2015-yillarda O‘zbekiston bosh prokurori sifatida ishlagan Rashidjon Qodirov 2019-yil iyunida bir qator og‘ir va o‘ta og‘ir jinoyatlarda ayblanib, 10 yilga ozodlikdan mahrum etilgan edi. Ixtiyor Abdullayev esa 2019-yil sentabrida O‘zbekiston harbiy sudi tomonidan 18 yilga ozodlikdan mahrum etilgani e’lon qilingan edi — u, jumladan, jinoiy uyushma tashkil etib, juda ko‘p miqdorda pora olish, O‘zbekiston manfaatlariga xilof ravishda bitimlar tuzish, tovlamachilikda ayblangan edi. Abdullayev qamoqqa olinishidan avval salkam bir yil DXXga rahbarlik qilgan, undan avval — 2015—2018 yillarda O‘zbekiston bosh prokurori sifatida ishlagan.Abdurahmon Tashanov, O‘zbekiston inson huquqlari “Ezgulik” jamiyati raisi
Izoh (0)