Xalq ta’limi vaziri Sherzod Shermatov Ichki ishlar vazirligi bilan hamkorlikda o‘tkazilgan qo‘shma hay’at majlisida O‘zbekistondagi maktablarda o‘quvchilarning bo‘lish vaqti Face ID tizimi orqali nazorat qilinishi joriy etilganini ma’lum qildi, deb xabar beradi O‘zA.
Majlisda ichki ishlar vaziri general-leytenant Po‘lat Bobojonov yoshlar o‘rtasidagi jinoyatchilikka qarshi kurashda hamda huquqbuzarliklarga nisbatan murosasiz munosabatda bo‘lish, joylarda ichki ishlar va xalq ta’limi bo‘limlari o‘rtasida o‘zaro hamkorlik va ma’lumot almashinuvini mustahkamlash kabi masalalar bugungi kunning eng dolzarb vazifasi sifatida belgilanganini aytib o‘tgan.
Huquqbuzarliklar profilaktikasi bosh boshqarmasi boshlig‘i polkovnik Baxtiyor Berdialiyev maktablarda davomat tadbirlarini o‘tkazishda sustkashliklarga yo‘l qo‘yilishi, o‘quvchilarni nazoratsiz qoldirish hamda profilaktika inspektorlari va maktab rahbariyatining o‘zaro hamkorlik olib bormaganligi oqibatida yo‘q qo‘yilgan og‘ir va o‘ta og‘ir turdagi jinoyatlar masalasiga to‘xtalib o‘tgan.
“O‘quvchilarni nazorat qilish va ota-onalar bilan o‘zaro hamkorlikni yanada kuchaytirish maqsadida maktablarda Face ID tizimini joriy etish, ta’lim sifatini oshirish maqsadida sinf xonalariga ovozli kameralar o‘rnatish va ularni ichki ishlar organlari hamda profilaktika inspektorlari bilan integratsiyalashuvini ta’minlash masalalariga alohida e’tibor qaratiladi”, — deyiladi xabarda.
“Bolalar imkon qadar erkin bo‘lishi uchun barcha sharoitlar yaratilib beriladi. Kuch ishlatar tizimlariga tashabbus va imkoniyat berilsa, ular bajonidil butun jamiyatni nazorat qilishdan xursand bo‘ladi. Lekin erkin bo‘lmagan O‘zbekiston rivojlana olmaydi. Aksincha, kuch ishlatar tizimlarini o‘zlari jamiyat nazoratida bo‘lishi kerak. Hozircha, aksi bo‘lyapti”, — deb yozadi Rabbimov.
Izoh (0)