Toshkentda Mingo‘rik arxeologik yodgorligi yonida IIBB Ma’naviyat va ma’rifat markazi binosi qurish to‘xtatildi, deb xabar bermoqda “Podrobno.uz”.
“Kecha soat 17:00 da markazni qurish ishlari to‘xtatildi. Juma kuniga qaror qabul qilish bo‘yicha kengash tayinlandi”, — degan Toshkent shahar IIBB Axborot multimedia markazi boshlig‘i, bosh boshqarma boshlig‘ining matbuot kotibi Irina Sayfutdinova.
Eslatib o‘tamiz, Mingo‘rik yaqinida joylashgan uylarda yashovchi aholi qurilish ishlari boshlangan tufayli yodgorlikka zarar yetishidan xavotirga tushgandi. Ular qurilish texnikasi ta’sirida yuzaga keladigan tebranish qadimiy yodgorlikka jiddiy shikast yetkazishi mumkin, degan fikrda.
Toshkent shahar IIBB hech kim yodgorlikni buzish niyatida emasligini, qurilish ishlari yodgorlikka ta’sir ko‘rsatishi yoki ko‘rsatmasligi haqida xulosa beruvchi ekspertlarga tegishli hujjatlar taqdim etilganini bildirgan.
Bundan bir necha yil avval ham ikki ming yillik tarixga ega ushbu yodgorlikda yoriqlar paydo bo‘lgani olimlarni xavotirga solgandi.
Ma’lumot uchun, Toshkentning Mirobod tumanida joylashgan Mingo‘rik arxeologiya yodgorligi YuNESKOning tarixiy obidalar ro‘yxatiga kiritilishi uchun nomzod qilib ro‘yxatga olingan.
Izoh (0)