Transport va logistika masalalarini operativ ko‘rib chiqish bo‘yicha Idoralararo komissiya tomonidan ichki turizmni rag‘batlantirish uchun subsidiyalar miqdori tasdiqlandi. Bu haqda Turizm va sport vazirligi matbuot xizmati xabar berdi.
Unga ko‘ra, aviatashuvchilarga mamlakatdagi ichki aviaqatnovlar chipta narxlarining 25 foizi miqdorida, shuningdek, turoperator va turagentlar tomonidan mahalliy sayyohlar uchun tashkil etilgan turlarga avia va temiryo‘l chiptalari narxining 15 foizi miqdorida subsidiyalar ajratiladigan yo‘nalishlar belgilandi.
Shuningdek, subsidiyalanadigan 10 ta aviaqatnov yo‘nalishi chipta narxlarining eng yuqori summalari ham tasdiqlangan. Misol uchun, Samarqand—Namangan aviaqatnovidagi chipta narxi 666,7 ming so‘mni tashkil etgan bo‘lsa, aviatashuvchiga beriladigan subsidiya hisobiga ushbu chipta narxining eng yuqori summasi 500 ming so‘mni tashkil etadi. Chipta turoperator orqali xarid qilinganda esa uning narxi 425 ming so‘mni tashkil qiladi.
Shu bilan birga, Vazirlar Mahkamasining 2012-yil 13-apreldagi 109-son qarorida nazarda tutilgan jamoaviy chiptalarni sotib olish guruhidagilar soni 10 nafardan 24 nafargacha bo‘lganda — 10 foizli, 25 va undan ortiq kishilik guruh uchun esa 15 foizli chegirmalar ham saqlanib qolingan.
Yo‘lovchi poyezdlari chipta narxlariga (tariflar) o‘zgarish kiritilgan taqdirda bu to‘g‘risida “O‘zbekiston temir yo‘llari” AJ, Turizm va sport vazirligining rasmiy saytlari hamda boshqa OAVlar va ijtimoiy tarmoqlarda keng e’lon qilinib borilishi belgilandi.
Shuningdek, qaror bilan respublika bo‘ylab joylashtirish vositalarining mehmonxona xizmatlari narxlarining subsidiyalanadigan eng yuqori (cheklangan) darajasi (summasi) 250 ming so‘m etib tasdiqlandi. Bunda turoperator va turagent tomonidan respublika bo‘ylab tashkil etilgan tur davomida mehmonxona xizmatining 10 foiz miqdoridagi subsidiyalanadigan eng yuqori summasi 25 ming so‘mdan oshmasligi belgilangan.
Prezidentimizning ichki va ziyorat turizmini rivojlantirish to‘g‘risidagi farmonining imzolanishi Farg‘ona vodiysida istiqomat qiluvchi aholining ham Buxoro, Samarqand hamda Xorazm viloyatlariga, ushbu hududlar aholisini esa Farg‘ona vodiysiga sayohat qilishlari uchun qulay imkoniyat taqdim etadi.
Xususan, 2021-yilning fevral oyida yo‘lga qo‘yilgan Urganch—Farg‘ona—Urganch aviayo‘nalishining birinchi oyida samolyotlarning bandligi 43,7 foizni tashkil etgan bo‘lsa, turoperator va turagentlarga yaratilgan qo‘shimcha imkoniyat natijasida samolyotlar bandligi mart oyida 87,9 foizga, ya’ni ikki barobarga oshgan.
Izoh (0)