21 майдан 25 майга қадар ёшлар учун кенг миқёсдаги тадбир — «Тошкент Беш ташаббус ҳаракати» бўлиб ўтади ва унинг доирасида 16 ёшдан 30 ёшгача бўлган йигит-қизлар вокал ижрочилар танлови — Tashkent Voice Fest, раққослар танлови — Tashkent Dance Fest ҳамда кўча санъаткорлари танлови — Street Art’да ўзини намоён этиши мумкин. Тадбир ташкилотчиси — Тошкент шаҳар ҳокимлиги.
Tashkent Voice Fest
Вокал ижрочиларнинг катта танлови Тошкентнинг энг яхши ва иқтидорли қўшиқчиларини аниқлаб беради. Танлов қатнашчилари видеоаризалар ёрдамида саралаб олинади. Энг яхшилар жонли эшитувга таклиф қилинади.Махсус тузилган профессионал жюри ижрони учта мезон бўйича баҳолайди — вокал ижро маҳорати, артистизм ва ижронинг бадиий ишонарлиги. Қўшиқлар исталган жанр ва тилда ижро этилиши мумкин.
Ҳозирга қадар танлов ташкилий қўмитасига тадбир сайтида мавжуд Telegram-бот орқали 100 дан ортиқ видеоариза келиб тушди.
«Тошкент Беш ташаббус ҳаракати»нинг барча меҳмонлари катта саҳнада бўлиб ўтадиган ҳаяжонли чорак финал, ярим финал ва финал батллари томошабинига айланиш имкониятига эга. Танловга машҳур журналист ва продюсер Никита Макаренко раҳбарлик қилади.
Tashkent Dance Fest
Рақс танлови Тошкентнинг барча кўзга кўринган раққосларини жамлайди. Томошабинлар Hip-Hop, Dancehall ва Break Dance услубидаги батллар гувоҳига айланади. Улар яккахон ҳамда жамоа тарзида мусобақага киришади.Танлов тўрт босқичда ўтказилади — онлайн-саралаш, рақс асосида саралаш, ярим финал ва финал. Иштирокчиларни саралашда барча босқичларда жюри раққоснинг мусиқавийлиги, рақс ижро этиш техникаси ва услубни билиш даражасини ҳисобга олади.
Ҳозиргача рўйхатга олинган иштирокчилар сони 50 нафардан ошган. Бу танловга таниқли хореограф Сергей Злотников раҳбарлик қилади.
Street Art
Ёш иқтидорли рассомлар ўз қобилиятларини Street Art — замонавий тасвирий санъат танловида намойиш этиши мумкин. Ҳозиргача танловда қатнашиш учун 50 дан зиёд ёш рассомлар ўз ишларини юборишди.Онлайн саралашдан сўнг танловга саккиз киши таклиф этилади ва улар тадбир бошланишга қадар махсус деворларда ўз ижод намуналарини тайёрлайди. Сўнг томошабинлар орасида овоз бериш жараёни ўтказилиб, унинг якунларига кўра ғолиб аниқланади.
Street Art — кўча рассомлари танлови учун онлайн-рўйхатга олиш 10 майда тугайди. Вокал ижро ва рақс танловлари учун аризалар қабул қилиш 15 майга қадар давом этади.
16 май куни жюри Tashkent Dance Fest иштирокчиларини онлайн-аризалар асосида саралаб олади. Худди шу куни жюри видеоаризаларни кўриб чиқади ва Tashkent Voice Fest саралашининг иккинчи босқичига ўтиши мумкин бўлган вокал ижрочиларни танлайди. Жонли эшитув 17 май куни бўлиб ўтади.
Танловларга рўйхатдан ўтиш тадбирнинг расмий сайти — www.toshkent21.uz’да ҳамда Telegram-бот ёрдамида амалга оширилади.
«Дарё» — «Тошкент Беш ҳаракат ташаббуси»нинг ахборот ҳамкоридир.
Изоҳ (0)