Toshkent shahar hokimligi ijtimoiy tarmoqlarda 9-may kuni poytaxtda “O‘lmas polk” (“Bessmertniy polk”) aksiyasini o‘tkazishga ruxsat berilgani to‘g‘risida tarqalgan xabarlarga munosabat bildirdi.
Ma’lum qilinishicha, Toshkent shahar hokimining o‘rinbosari Muhtor Muhitdinov poytaxtda “O‘lmas polk” aksiyasini o‘tkazish bo‘yicha qilingan murojaatni o‘rnatilgan tartibda Toshkent shahar IIBB va YHXBga yo‘naltirgan. Biroq internetdagi xabarda yozilganidek, mazkur murojaatga “Prinyat k ispolneniyu v ustanovlennom poryadke” tarzida emas, balki “O‘rnatilgan tartibda ko‘rib chiqilsin”, ya’ni “Rassmotret v ustanovlennom poryadke” deya imzo chekilgan.
Ta’kidlanishicha, mutasaddi rahbarning topshirig‘ini noto‘g‘ri tarjima qilish oqibatida anglashilmovchilik yuzaga kelgan. Natijada keng jamoatchilikka “mutasaddilar mazkur aksiyani o‘tkazish uchun ruxsat berishgan bo‘lsa-da, huquq-tartibot idoralari bunga qarshi chiqmoqda” degan mazmunda asossiz xabar tarqatilmoqda.
“‘O‘lmas polk’ aksiyasi tashkilotchilari murojaat qilgan hech bir mutasaddi tashkilot tomonidan bugungi pandemiya sharoitida mazkur ommaviy tadbirni o‘tkazishga ruxsat berilmagan”, — deyiladi bayonotda.
“Mavjud vaziyatdan kelib chiqib, bu yil mamlakatimizda Xotira va qadrlash kuni umumxalq bayramiga bag‘ishlangan tadbirlarni karantin qoidalariga qat’iy rioya qilgan holda, ixcham shakllarda o‘tkazish choralari belgilangan. Bunday cheklovlar yuzlab odamlar ishtirok etishi ko‘zda tutilgan ‘O‘lmas polk’ ommaviy tadbiriga ham daxldor ekanini unutmaslik lozim”, — deyiladi hokimlik xabarida.
Eslatib o‘tamiz, 2019-yilda ham shahar ma’muriyati ruxsat bermaganiga qaramay, 9-may kuni yuzlab odamlar Toshkentdagi “Birodarlar qabristoni”dagi haykal oldiga kelib, qo‘llarida portret ushlagan holda “g‘alaba” qo‘shiqlari sadosi ostida “O‘lmas polk” aksiyasini o‘tkazgan edi.
Izoh (0)