Jahon sog‘liqni saqlash tashkiloti Amerikaning Moderna kompaniyasi ishlab chiqargan koronavirusga qarshi vaksinani favqulodda foydalanish uchun tavsiya etilgan preparatlar ro‘yxatiga qo‘shdi, deb yozmoqda Meduza.
Aholining immunitetini oshirish bo‘yicha mutaxassislarning strategik maslahatlashuv guruhi vaksina tarkibini o‘rganib chiqdi va preparatni 18 yoshdan yuqori bo‘lganlar uchun tavsiya qildi. JSST ma’lumotlariga ko‘ra, vaksinaning samaradorligi 94,1 foizni tashkil etadi.
Moderna JSST tomonidan ma’qullangan beshinchi vaksina hisoblanadi. Bungacha, tashkilot Pfizer/BioNTech, Jannsen va AstraZeneca’ning ikkita variantini ma’qullangan preparatlar ro‘yxatiga qo‘shgan edi.
Rossiyaning “Sputnik V” vaksinasi hali JSST tomonidan ma’qullanmagan. Aprel oyining oxirida JSST va Yevropa dori-darmon agentligi klinik amaliyot bo‘yicha hamkorlik tekshiruv o‘tkazayotgani, 10-maydan boshlab esa joylarda ishlab chiqarish amaliyoti bilan bog‘liq tekshiruvlar boshlanishi haqida xabar berildi.
Avvalroq Moderna farmatsevtika kompaniyasi 2021-yilning ikkinchi choragida o‘zining koronavirusga qarshi vaksinasini Kanada va Buyuk Britaniyaga rejalashtirilganidan kamroq yetkazib berishi ma’lum qilindi. Koronavirus bilan kasallanganlar sonining keskin ortishini boshdan kechirayotgan Kanada Moderna vaksinasi yetkazib berilishining qisqarishi munosabati bilan “hafsalasi pir bo‘lganini” ma’lum qildi.
Litvada 78 yoshli erkak koronavirusga qarshi Moderna vaksinasining ikkinchi dozasini olganidan so‘ng vafot etdi.
Shuningdek, kompaniya o‘zi ishlab chiqargan vaksina ustida olib borilgan tadqiqotlardan so‘ng preparatning samaradorlik darajasini pasaytirdi. 2020-yil dekabr oyida Moderna vaksinasining samaradorligi 94,1 foizga baholangan edi. Hozir ma’lum bo‘lishicha, preparat 90 foiz holatda infeksiyani yuqtirishning oldini oladi, kasallikning og‘ir shaklidan esa 95 foiz himoya qiladi. 30 mingdan ortiq odamni qamrab olgan klinik sinovlarning uchinchi bosqichi natijalari bo‘yicha ushbu xulosaga kelingan.
Ma’lumot uchun, Moderna koronavirus vaksinasini olti oylikdan 12 yoshgacha bo‘lgan bolalarda sinashni boshlagan edi. Sinov jarayonida, taxminan, AQSh va Kanadadan 6750 nafar bola qatnashishi rejalashtirilgan.
Izoh (0)