ЖССТ Moderna вакцинасидан фойдаланишни маъқуллади

Жаҳон соғлиқни сақлаш ташкилоти Американинг Moderna компанияси ишлаб чиқарган коронавирусга қарши вакцинани фавқулодда фойдаланиш учун тавсия этилган препаратлар рўйхатига қўшди, деб ёзмоқда Meduza.

Аҳолининг иммунитетини ошириш бўйича мутахассисларнинг стратегик маслаҳатлашув гуруҳи вакцина таркибини ўрганиб чиқди ва препаратни 18 ёшдан юқори бўлганлар учун тавсия қилди. ЖССТ маълумотларига кўра, вакцинанинг самарадорлиги 94,1 фоизни ташкил этади.

Moderna ЖССТ томонидан маъқулланган бешинчи вакцина ҳисобланади. Бунгача, ташкилот Pfizer/BioNTech, Jannsen ва AstraZeneca’нинг иккита вариантини маъқулланган препаратлар рўйхатига қўшган эди.

Россиянинг «Спутник V» вакцинаси ҳали ЖССТ томонидан маъқулланмаган. Апрель ойининг охирида ЖССТ ва Европа дори-дармон агентлиги клиник амалиёт бўйича ҳамкорлик текширув ўтказаётгани, 10 майдан бошлаб эса жойларда ишлаб чиқариш амалиёти билан боғлиқ текширувлар бошланиши ҳақида хабар берилди.

Аввалроқ Moderna фармацевтика компанияси 2021 йилнинг иккинчи чорагида ўзининг коронавирусга қарши вакцинасини Канада ва Буюк Британияга режалаштирилганидан камроқ етказиб бериши маълум қилинди. Коронавирус билан касалланганлар сонининг кескин ортишини бошдан кечираётган Канада Moderna вакцинаси етказиб берилишининг қисқариши муносабати билан «ҳафсаласи пир бўлганини» маълум қилди.

Литвада 78 ёшли эркак коронавирусга қарши Moderna вакцинасининг иккинчи дозасини олганидан сўнг вафот этди.

Шунингдек, компания ўзи ишлаб чиқарган вакцина устида олиб борилган тадқиқотлардан сўнг препаратнинг самарадорлик даражасини пасайтирди. 2020 йил декабрь ойида Moderna вакцинасининг самарадорлиги 94,1 фоизга баҳоланган эди. Ҳозир маълум бўлишича, препарат 90 фоиз ҳолатда инфекцияни юқтиришнинг олдини олади, касалликнинг оғир шаклидан эса 95 фоиз ҳимоя қилади. 30 мингдан ортиқ одамни қамраб олган клиник синовларнинг учинчи босқичи натижалари бўйича ушбу хулосага келинган.

Маълумот учун, Moderna коронавирус вакцинасини олти ойликдан 12 ёшгача бўлган болаларда синашни бошлаган эди. Синов жараёнида, тахминан, АҚШ ва Канададан 6750 нафар бола қатнашиши режалаштирилган.