Buyuk Britaniya va Yevropa Ittifoqi Britaniyaning hamjamiyatdan chiqib ketishi (Brexit) bo‘yicha barcha rasmiyatchiliklarni yakunladi. Tomonlar o‘rtasida savdo va hamkorlik to‘g‘risidagi bitim kuchga kirdi, deb yozadi “TASS”.
Xabarga ko‘ra, Buyuk Britaniya va Yevroittifoq o‘rtasida ikki tomonlama munosabatlar to‘g‘risida kelishuv Bryussel vaqti bilan 1-mayga o‘tar kechasi soat 00:00 da (Toshkent vaqti bilan 03:00) kuchga kirdi.
“Savdo va hamkorlik to‘g‘risidagi bitimning imzolanishi Yevropa Ittifoqi va Buyuk Britaniyaning har ikki tomondagi fuqarolar va biznes manfaatlari yo‘lidagi yangi munosabatlariga qonuniy ishonch beradi. Biz Buyuk Britaniyani yaxshi qo‘shni, azaliy ittifoqchi va muhim sherik sifatida qadrlaymiz”, — dedi Yevropa Ittifoqi Kengashi.
28-aprel kuni Yevropa Parlamenti Bryusselda bo‘lib o‘tgan yalpi majlisda ushbu hujjatni yoqlab ovoz berdi va 29-aprel kuni hujjat Yevropa Ittifoqi Kengashi tomonidan ratifikatsiya qilindi.
Buyuk Britaniya kelishuv bo‘yicha barcha protseduralarni bundan oldinroq bajargan edi. 2020-yil 31-dekabrda Buyuk Britaniya qirolichasi Yelizaveta II Brexit’dan keyin London va Bryussel o‘rtasidagi bo‘lajak munosabatlar to‘g‘risidagi qonun loyihasiga qirollik roziligini berdi.
1-yanvar kuni Buyuk Britaniya va Yevropa Ittifoqi o‘rtasidagi rasmiy Brexit’dan keyin 11 oylik o‘tish davri amal qilishni to‘xtatdi, bu davrda qirollik hamjamiyatning boshqa a’zolari singari barcha tartib-qoidalarga bo‘ysunib, imtiyozlarga egalik qilib keldi.
1-yanvardan 1-maygacha London va Bryussel o‘zaro munosabatlarini to‘rt oy davomida vaqtincha qo‘llaniladigan, hali tasdiqlanmagan kelishuv asosida tartibga soldi.
Avvalroq Brexit’dan keyin Buyuk Britaniyaning Yevropa Ittifoqiga eksport hajmi kamaygani haqida xabar berilgandi.
Eslatib o‘tamiz, Buyuk Britaniya va Yevropa Ittifoqi 2020-yil dekabr oyida Brexit’dan keyingi o‘zaro hamkorlik shartlarini kelishib olgan va Birlashgan Qirollik 2021-yil 1-fevral kuni 47 yillik a’zolikdan so‘ng Yevropa Ittifoqini tark etgan. Yanvar oyida Bloomberg nashri Buyuk Britaniyaning Yevroittifoqdan chiqish haqidagi qarori mamlakat iqtisodiyotiga 132,8 milliard funt sterling (173,8 milliard dollar)ga tushganini ma’lum qilgandi.
Izoh (0)