Litvada Moderna vaksinasini qabul qilgan erkak vafot etdi. Ayni vaqtda kompaniya o‘z vaksinasining samaradorlik darajasini pasaytirdi

Litvaning Klaypeda shahrida yashovchi 78 yoshli erkak koronavirusga qarshi Moderna vaksinasining ikkinchi dozasini olganidan so‘ng vafot etdi. Bu haqda voqea sodir bo‘lgan kasalxonaning bosh shifokori Loreta Venskenga tayanib “RBK” xabar berdi.

Bosh shifokorning so‘zlariga ko‘ra, dastlabki ma’lumotlar pensionerning o‘limi vaksina bilan bog‘liq emasligini ko‘rsatmoqda.

“Fikrimcha, qariyaning o‘limiga emlashning hech qanday aloqasi yo‘q. Chunki buni ko‘rsatuvchi alomatlar, xususan, trombolizm yoki anafilaktik reaksiya yo‘q”, — dedi Vensken. Shuningdek, u erkakning kasalxonada uzoq vaqt kuzatuv ostida bo‘lgani, unda jiddiy kasalliklar bo‘lmaganini ta’kidladi.

Moderna biotexnika kompaniyasi o‘zi ishlab chiqargan vaksina ustida olib borilgan tadqiqotlardan so‘ng preparatning samaradorlik darajasini pasaytirdi.

2020-yil dekabr oyida Moderna vaksinasining samaradorligi 94,1 foizga baholangan edi. Hozir ma’lum bo‘lishicha, preparat 90 foiz holatda infeksiyani yuqtrishning oldini oladi, kasallikning og‘ir shaklidan esa 95 foiz himoya qiladi. 30 mingdan ortiq odamni qamrab olgan klinik sinovlarning uchinchi bosqichi natijalari bo‘yicha ushbu xulosaga kelingan.

Tadqiqot natijalari Amerika akusherlik va ginekologiya jurnalida chop etilgan. Unda ta’kidlanishicha, koronavirusga qarshi Pfizer va Moderna vaksinalari homilador ayollar uchun xavfsiz va samarali hisoblanadi.

Eslatib o‘tamiz, Moderna kompaniyasi fevral oyida o‘z vaksinasini koronavirusning Janubiy Afrika Respublikasida paydo bo‘lgan yangi shtammiga qarshi samarali bo‘lgan yangilangan versiyasini ishlab chiqqanini ma’lum qildi.

Avvalroq Moderna koronavirus vaksinasini olti oylikdan 12 yoshgacha bo‘lgan bolalarda sinashni boshlagan edi. Sinov jarayonida, taxminan, AQSh va Kanadadan 6750 nafar bola qatnashishi rejalashtirilgan.

Ma’lumot uchun, AQSh Oziq-ovqatlar va dorilar sifati bo‘yicha boshqarmasi (FDA) 18-dekabr kuni Amerikaning Moderna farmatsevtika kompaniyasi tomonidan ishlab chiqarilgan koronavirusga qarshi vaksinani mamlakatda qo‘llash uchun ruxsat bergan.