AQShning Moderna kompaniyasi o‘zining mRNA-1273 vaksinasini olti oylikdan 12 yoshgacha bo‘lgan bolalarda sinovini boshladi. Sinov jarayonida, taxminan, AQSh va Kanadadan 6750 nafar bola qatnashishi rejalashtirilgan. Bu haqda Tengrinews xabar berdi.
Tadqiqot KidCOVE, Milliy sog‘liqni saqlash instituti qoshidagi Milliy allergiya va yuqumli kasalliklar instituti (NIAID) va AQSh Sog‘liqni saqlash va aholiga xizmat ko‘rsatish vazirligining Kengaytirilgan biotibbiy tadqiqotlar va rivojlantirish boshqarmasi (BARDA) bilan hamkorlikda olib borilmoqda.
“AQSh va Kanadadagi sog‘lom bolalarda mRNA-1273 tadqiqotining 2/3 bosqichini boshlashdan mamnunmiz, NIAID va BARDA’ga hamkorlik uchun minnatdorchilik bildiramiz”, — dedi Moderna bosh direktori Stefan Bansel.
Klinik tekshiruvlar davomida ikki doza vaksinaning xavfsizligi, ta’siri, reaktogenligi va samaradorligi baholanadi. Ular bolalarga 28 kun farq bilan beriladi.
Birinchi bosqichda ikki yoshdan 12 yoshgacha bo‘lgan bolalar ikkita dozadan birini (50 yoki 100 mikrogramm) qabul qiladi, olti oylikdan ikki yoshgacha bo‘lgan bolalar vaksina dozasining uchdan birini (25, 50 yoki 100 mikrogramm) qabul qiladi. Keyin mutaxassislar platsebo nazorati ostida o‘tkazilgan tadqiqotning ikkinchi bosqichida qaysi dozadan foydalanishni aniqlash uchun oraliq tahlil oladi. Ikkinchi emlashdan so‘ng tadqiqot ishtirokchilari bir yil davomida kuzatuv ostida bo‘ladi.
Ma’lumot uchun, AQSh Oziq-ovqatlar va dorilar sifati bo‘yicha boshqarmasi (FDA) 18-dekabr kuni Moderna farmatsevtika kompaniyasi tomonidan ishlab chiqarilgan koronavirusga qarshi vaksinani mamlakatda qo‘llash uchun ruxsat bergan edi.
Avvalroq Garvardning Amerika siyosiy tadqiqotlar markazi (Harvard CAPS) va Harris Poll kompaniyasining so‘rovnomalariga ko‘ra, AQSh aholisining deyarli 41 foizi COVID-19’ga qarshi emlanishni istamasligi ma’lum bo‘lgan.
Izoh (0)