Erdo‘g‘on Kipr bo‘yicha yangi sammit biror natija olib kelishiga ishonmasligini aytdi

Kipr masalasida BMT bosh kotibi Antoniu Guterrish tomonidan bir necha oy ichida o‘tkaziladigan navbatdagi sammit yana samarasiz bo‘ladi. Turkiya prezidenti Rajab Toyyib Erdo‘g‘on shunday fikrda, deb yozadi “TASS”.

Erdo‘g‘on bunday natija uchun aybni Kiprning grek tomoniga yukladi. “Men Kipr-greklarga ishonmayman. Ular hech qachon o‘zlarini adolatli tutmagan”, — dedi Turkiya rahbari.

Sammit haqida gapirganda prezident “Endi u 2-3 oyga qoldirildi, ammo bu safar ham biror natijaga erishilishiga ishonmayman, chunki kiprlik greklar haqiqatgo‘y emas” — deya qo‘shimcha qildi.

Jenevada 27—29-aprelda an’anaviy 5+1 formatida, ya’ni Kiprdan ikki vakil hamda Kipr xavfsizligiga kafil davlatlar Gretsiya, Turkiya va Buyuk Britaniya tashqi ishlar vazirlari va shaxsan BMT bosh kotibi ishtirokida bo‘lib o‘tgan Kipr kelishuvi bo‘yicha uch kunlik konferensiyada tomonlarning pozitsiyalari bir-biriga mos kelmadi.

Kipr-turk delegatsiyasi muzokaralar jarayonini tiklashning dastlabki sharti sifatida orolda ikki davlat mavjudligini tan olish talabini ilgari surdi, bu esa BMT Xavfsizlik Kengashi qarorlarining qoidalariga ziddir. Qoidaga ko‘ra, Kiprda ikki zonali va ikki jamoali federatsiya tuzilishi kerak.

Kipr-grek tomon esa ushbu asosiy xalqaro hujjatga qat’iy rioya qilishni talab qildi.

29-aprel kuni sammit yakunlanganini e’lon qilgan Guterrish Jenevada tomonlar Kipr kelishuvi bo‘yicha jamoalararo muloqotni tiklash uchun yetarli munosabatni bildirmaganini aytdi. Shu bilan birga, ular ikki yoki uch oy ichida bo‘lib o‘tishi mumkin bo‘lgan yangi sammitni o‘tkazish to‘g‘risida kelishuvga erishdi.

Shu tariqa, Jeneva konferensiyasi tomonlarning behuda yakunlangan ikkinchi uchrashuviga aylandi: xuddi shu holat 2017-yilda Shveysariyaning Kran-Montana chang‘i kurortida Kipr muammosini hal qilish bo‘yicha o‘tkazilgan sammitda ham ro‘y bergan edi.