Davlat statistika qo‘mitasi yuridik shaxs maqomiga ega bo‘lgan korxona va tashkilotlarda ishlovchi xodimlarning o‘rtacha oylik ish haqiga oid ma’lumotlar bilan bo‘lishdi.
Ma’lum qilinishicha, 2021-yil yanvar—mart oyida korxona ishchilarining o‘rtacha oylik nominal hisoblangan ish haqlari 2,87 million so‘mni tashkil etgan. Bu o‘tgan yilning mos davriga nisbatan 11,3 foizga yuqori.
O‘rtacha oylik ish haqining eng yuqorisi moliyaviy va sug‘urta iqtisodiy faoliyatida (6,46 million so‘m), axborot va aloqa (4,83 million so‘m) sohasida, eng kami – ta’lim (2,24 million so‘m) va sog‘liqni saqlash va ijtimoiy xizmat ko‘rsatish sohasida (2,04 million so‘m) qayd etilgan.
Hududlar kesimida eng ko‘p ish haqini Toshkent (4,2 million so‘m), Navoiy (3,8 million so‘m) va Toshkent viloyati (3 million so‘m) aholisi olgan.
O‘rtacha oylik nominal hisoblangan ish haqi tarkibiga qo‘shimcha to‘lovlar, mukofot pullari, rag‘batlantiruvchi to‘lovlar, kompensatsiya va ishlamagan vaqti uchun to‘lovlar, shuningdek, jismoniy shaxslardan olinadigan daromad solig‘i va kasaba uyushmasiga ajratmalar kiradi.
Ma’lumot uchun, O‘zbekistonda 2019-yilda o‘rtacha oylik nominal ish haqi 2,3 million so‘mni, 2020-yilda esa 2,66 million so‘mni tashkil etgan.
Izoh (0)