27-aprel kuni Rossiya mudofaa vaziri, armiya generali Sergey Shoygu boshchiligidagi delegatsiya Buxoroga keldi, deb xabar beradi viloyat hokimligi matbuot xizmati. Oliy martabali mehmonni O‘zbekiston mudofaa vaziri, general-leytenant Bahodir Qurbonov, viloyat hokimi Botir Zaripov va boshqa mutasaddilar kutib olgan.
Tashrif doirasida delegatsiya a’zolari Buxoroning diqqatga sazovor joylari bilan tanishgan. Jumladan, mehmonlar dastlab “Sitorai Mohi xossa” majmuasini borib ko‘rgan. Shuningdek, mehmonlar Buxoroning markaziy maydonlaridan biri sanalgan Ko‘kaldosh, Devonbegi madrasalari hamda Devonbegi xonaqohi binolaridan tashkil topgan Labi Hovuz me’moriy ansambli bilan tanishgan.
Ma’lum qilinishicha, ikki davlat mudofaa vazirlari Buxoroda xalqaro va mintaqaviy xavfsizlik muammolarini, ikki tomonlama harbiy va harbiy-texnik hamkorlikning dolzarb masalalarini muhokama qilgan.
Shuningdek, dasturdan ikki mamlakat mudofaa idoralarining rahbarlari ishtirokida yig‘ilish o‘tkazilishi rejalashtirilgan. Yig‘ilish davomida bir qator masalalar muhokama qilinishi ko‘zda tutilmoqda.
Eslatib o‘tamiz, Rossiya mudofaa vaziri Sergey Shoygu O‘zbekistonga oxirgi marta 2018-yilning mayida kelgan edi. O‘shanda Rossiya mudofaa vaziri Qurolli Kuchlar akademiyasi bilan tanishgan, hukumat darajasidagi bir qancha uchrashuvlarni o‘tkazgan edi.
Izoh (0)