Давлат статистика қўмитаси юридик шахс мақомига эга бўлган корхона ва ташкилотларда ишловчи ходимларнинг ўртача ойлик иш ҳақига оид маълумотлар билан бўлишди.
Маълум қилинишича, 2021 йил январь—март ойида корхона ишчиларининг ўртача ойлик номинал ҳисобланган иш ҳақлари 2,87 миллион сўмни ташкил этган. Бу ўтган йилнинг мос даврига нисбатан 11,3 фоизга юқори.
Ўртача ойлик иш ҳақининг энг юқориси молиявий ва суғурта иқтисодий фаолиятида (6,46 миллион сўм), ахборот ва алоқа (4,83 миллион сўм) соҳасида, энг ками – таълим (2,24 миллион сўм) ва соғлиқни сақлаш ва ижтимоий хизмат кўрсатиш соҳасида (2,04 миллион сўм) қайд этилган.
Ҳудудлар кесимида энг кўп иш ҳақини Тошкент (4,2 миллион сўм), Навоий (3,8 миллион сўм) ва Тошкент вилояти (3 миллион сўм) аҳолиси олган.
Ўртача ойлик номинал ҳисобланган иш ҳақи таркибига қўшимча тўловлар, мукофот пуллари, рағбатлантирувчи тўловлар, компенсация ва ишламаган вақти учун тўловлар, шунингдек, жисмоний шахслардан олинадиган даромад солиғи ва касаба уюшмасига ажратмалар киради.
Маълумот учун, Ўзбекистонда 2019 йилда ўртача ойлик номинал иш ҳақи 2,3 миллион сўмни, 2020 йилда эса 2,66 миллион сўмни ташкил этган.
Изоҳ (0)