O‘zbekistonda bir sutka ichida 17 mingdan ortiq o‘qituvchi, bog‘cha tarbiyachilari va surunkali kasalligi bor fuqarolar emlandi

Toshkentda 27-apreldan bog‘cha xodimlari va maktab o‘qituvchilarini koronavirusga qarshi vaksina bilan emlash boshlangandi. Sog‘liqni saqlash vazirligining ma’lum qilishicha, o‘tgan bir sutka ichida O‘zbekiston bo‘ylab ushbu toifaga kiruvchi 17 486 kishi emlangan.

Jumladan:

• 9343 nafar o‘qituvchi,
• 5298 nafar maktabgacha ta’lim muassasalari xodimlari,
• 2845 nafar surunkali kasalligi borlar koronavirusga qarshi vaksina qabul qilgan.

Birinchi kunda maktab o‘qituvchilarining 22 foizi AstraZeneca, 78 foizi ZF-UZ-VAC2001 bilan emlangan bo‘lsa, maktabgacha ta’lim muassasalari xodimlarida bu ko‘rsatkich mos ravishda 11 va 89 foizni, surunkali kasalligi borlarda esa 23 va 77 foizni tashkil etgan.

Avvalroq Toshkent aholisining 65 yoshdan oshgan qatlamini O‘zbekistonga olib kelingan “Sputnik V” vaksinasi bilan emlash ishlari boshlangani, emlash bepul amalga oshirilayotgani to‘g‘risida xabar berilgandi.

Ma’lumot uchun, O‘zbekistonda 1-apreldan 65 yoshdan katta shaxslar va tibbiyot xodimlarini koronavirusga qarshi o‘zbek—xitoy ZF-UZ-VAC2001 va AstraZeneca vaksinalari bilan emlash jarayoni boshlangandi. 27-aprel holatiga ko‘ra, butun mamlakat bo‘yicha 600 mingdan ortiq fuqaro koronavirusga qarshi emlangan. Hukumat iyun oyi oxirigacha 4 millionga yaqin, yil oxirigacha 7 million aholini koronavirusga qarshi emlashni rejalashtirgan.