Ўзбекистонда бир сутка ичида 17 мингдан ортиқ ўқитувчи, боғча тарбиячилари ва сурункали касаллиги бор фуқаролар эмланди

Тошкентда 27 апрелдан боғча ходимлари ва мактаб ўқитувчиларини коронавирусга қарши вакцина билан эмлаш бошланганди. Соғлиқни сақлаш вазирлигининг маълум қилишича, ўтган бир сутка ичида Ўзбекистон бўйлаб ушбу тоифага кирувчи 17 486 киши эмланган.

Жумладан:

• 9343 нафар ўқитувчи,
• 5298 нафар мактабгача таълим муассасалари ходимлари,
• 2845 нафар сурункали касаллиги борлар коронавирусга қарши вакцина қабул қилган.

Биринчи кунда мактаб ўқитувчиларининг 22 фоизи AstraZeneca, 78 фоизи ZF-UZ-VAC2001 билан эмланган бўлса, мактабгача таълим муассасалари ходимларида бу кўрсаткич мос равишда 11 ва 89 фоизни, сурункали касаллиги борларда эса 23 ва 77 фоизни ташкил этган.

Аввалроқ Тошкент аҳолисининг 65 ёшдан ошган қатламини Ўзбекистонга олиб келинган «Спутник V» вакцинаси билан эмлаш ишлари бошлангани, эмлаш бепул амалга оширилаётгани тўғрисида хабар берилганди.

Маълумот учун, Ўзбекистонда 1 апрелдан 65 ёшдан катта шахслар ва тиббиёт ходимларини коронавирусга қарши ўзбек—хитой ZF-UZ-VAC2001 ва AstraZeneca вакциналари билан эмлаш жараёни бошланганди. 27 апрель ҳолатига кўра, бутун мамлакат бўйича 600 мингдан ортиқ фуқаро коронавирусга қарши эмланган. Ҳукумат июнь ойи охиригача 4 миллионга яқин, йил охиригача 7 миллион аҳолини коронавирусга қарши эмлашни режалаштирган.