Toshkent shahridagi Jahon iqtisodiyoti va diplomatiya universiteti kam sonli talabalarida koronavirus infeksiyasi qayd etildi, deya xabar bermoqda universitet matbuot xizmati.
Qayd etilishicha, kasallikning talaba va o‘qituvchilar orasida tarqalishining oldini olish maqsadida universitetda o‘quv jarayoni 14 kunga masofaviy (onlayn) shaklga o‘tkazildi.
Mashg‘ulotlar universitetning Moodle masofaviy ta’lim tizimi orqali davom etishi ma’lum qilingan.
Bundan avval Alisher Navoiy nomidagi Toshkent davlat o‘zbek tili va adabiyoti universitetida professor-o‘qituvchilari, talabalari orasida koronavirusga chalinish holati aniqlangani sabab darslar 19-apreldan masofaviy shaklga o‘tkazilgani haqida xabar berilgan edi. O‘zbekiston jurnalistika va ommaviy kommunikatsiyalar universitetida ham darslar 12-apreldan boshlab ikki haftaga onlayn shaklga o‘tkazildi.
Shuningdek, Samarqand iqtisodiyot va servis institutida ham o‘qish koronavirus sabab masofaviy shaklga o‘tkazilishi haqida xabar berildi.
Avvalroq O‘zbekiston davlat konservatoriyasining 4 nafar o‘qituvchi va 1 nafar talabasida koronavirus aniqlanib, OTM masofaviy ta’limga o‘tgandi. Shuningdek, 25-mart kuni Toshkent moliya instituti va Toshkent transport universiteti talabalarida ham koronavirus aniqlangani sabab fakultet talabalari masofaviy ta’limga o‘tkazilgandi.
O‘zbekiston davlat konservatoriyasida va Toshkent moliya institutida ham darslar 26-martdan 8-aprelga qadar (14 kun) masofaviy shaklga o‘tkazilgandi. O‘zbekiston xalqaro Islom akademiyasida 14 kunlik karantin e’lon qilinib, o‘quv jarayoni 26-martdan 6-aprelga qadar masofaviy tarzda amalga oshirildi.
Bundan tashqari, Toshkent transport universiteti talabasida ham koronavirus aniqlangani sabab fakultet talabalari masofaviy ta’limga o‘tkazilgan, Toshkentdagi Inha universiteti talabasida koronavirus aniqlangani sabab ushbu OTM 23-martdan boshlab ikki hafta karantinga yopilgandi.
Izoh (0)