Toshkentdagi Inha universiteti ikki hafta karantinga yopildi. Sabab — bir nafar talabada koronavirus aniqlangan

Toshkent shahridagi Inha universiteti 23-martdan ikki hafta muddatga karantinga yopildi, deya xabar bermoqda “Yuksalish” umummilliy harakati.

Xabarni universitet matbuot xizmati ham tasdiqlagan. Unda ma’lum qilinishicha, universitetning ikkala binosi, jumladan, sinf xonalari, laboratoriyalar, kutubxona, oshxonalar, yo‘laklar, zallar, zinapoyalar, liftlar va boshqa joylar to‘liq dezinfeksiya qilingan.

Qayd etilishicha, bir nafar talabada koronavirus aniqlangan.

Bundan avval Toshkentda koronavirusga chalinish holatlari, asosan, o‘quvchilar, talabalar va tashkilot xodimlari orasida ko‘paygani ma’lum qilingandi. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan, 117-sonli bog‘chada ikki nafar tarbiyachi va bolalarda koronavirus aniqlangani sabab mazkur bog‘cha vaqtincha yopildi.