Toshkent viloyatida tanishining suratlarini internetda tarqatish bilan qo‘rqitib, undan 5 mln so‘m talab qilgan nigeriyalik ushlandi

Toshkent viloyatida tovlamachilik yo‘li bilan tanishidan pul talab qilgan Nigeriya fuqarosi qo‘lga olindi, deya xabar qilmoqda Tergov departamenti.

Qayd etilishicha, 2021-yilning 14-aprel kuni Toshkent viloyati IIBB huzuridagi Tergov boshqarmasi, Jinoyat qidiruv bo‘limi va DXX xodimlari bilan hamkorlikda tezkor tadbir o‘tkazilgan.

Tadbir davomida O‘zbekistonga ingliz tili fani bo‘yicha o‘qitish maqsadida kelgan nigeriyalik 34 yoshli O.I. tanishi X.O.ni o‘z uyida mehmon qilib, uning ichimlik suviga noma’lum modda qo‘shib bergan.

Nigeriyalik X.O.ni sarxush holatga kelganidan foydalanib rasmga tushirgan va ushbu suratlarni Telegram messenjeri orqali tarqatib yubormasligi evaziga 5 000 000 so‘m pul talab qilgan.

Nigeriya fuqarosi Toshkent shahar Yunusobod tumanida joylashgan Shoxsaroy to‘yxonasi oldida X.O.dan 2 000 000 so‘m pullarni tovlamachilik yo‘li bilan olayotgan vaqtida qo‘lga olingan.

Mazkur holat yuzasidan Yangiyo‘l shahar IIB huzuridagi Tergov bo‘limi tomonidan O.I.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan.

Tergov davomida jinoyatning kelib chiqish sabablari to‘liq o‘rganilib, huquqiy baho berilishi ta’minlanishi ma’lum qilingan.

Hozirda tergov harakatlari olib borilmoqda.

Bundan avval Samarqandda erkakning o‘zga ayol bilan yozishmalarini xotiniga ko‘rsatmaslik evaziga 14 mln so‘m talab qilgan ayol ushlangani, Samarqanddagi restoranda 1 mln so‘mga ovqatlanib, pul to‘lamasdan ketgan shaxsning telefon va pullarini olib qo‘ygan ofitsiantga nisbatan jinoiy ish qo‘zg‘atilgani hamda Samarqandda 21 yoshli qizning shaxsiy suratlarini tarqatib yubormaslik evaziga 400 dollar so‘ragan institut o‘qituvchisi ushlangani haqida xabar berilgandi.