Qozog‘iston prezidenti Qosim-Jo‘mart To‘qayev Turkmaniston prezidenti Gurbanguli Berdimuhamedovga otasining vafoti munosabati bilan hamdardlik telegrammasini yubordi. Bu haqda Oq o‘rda matbuot xizmatiga tayanib, Tengrinews xabar berdi.
Xabarga ko‘ra, To‘qayev Qozog‘iston xalqi va o‘z nomidan Gurbanguli Berdimuhamedovga otasi Malikguli Berdimuhamedovning vafoti munosabati bilan chuqur hamdardlik bildirgan.
“Otangizning yorqin xotirasi uning yaqinlari va barcha vatandoshlar qalbida yaxshi inson, dono ustoz va hayotini vatanga fidokorona xizmat qilishga bag‘ishlagan haqiqiy vatanparvar sifatida abadiy saqlanib qoladi. Qaytarib bo‘lmas yo‘qotish azobiga sherik bo‘lar ekanman, sizga va oilangizga ushbu og‘ir paytda kuch va matonat tilayman ”, — deyiladi Qozog‘iston prezidentining telegrammasida.
Matbuot xizmatining xabar berishicha, Elboshi — Qozog‘istonning birinchi prezidenti Nursulton Nazarboyev Berdimuhamedovning otasi vafot etgani haqidagi xabarni chuqur qayg‘u bilan qabul qildi.
“Yaqiningizni yo‘qotish — bu tuzatib bo‘lmas qayg‘u. Sizga va oilangizga chuqur hamdardlik bildiraman. Ishonchim komilki, butun hayotini Turkmaniston xalqi manfaati uchun bag‘ishlagan otangizning yorqin qiyofasi uni tanigan odamlar qalbida abadiy saqlanib qoladi ”, — deyiladi Nazarboyevning telegrammasida.
Shuningdek, Turkiya vitse-prezidenti Fuat Oqtay ham Gurbanguli Berdimuhamedovga otasining vafoti munosabati bilan hamdardlik bildirdi.
“Men Turkmaniston prezidenti Gurbanguli Berdimuhamedovning otasi Malikguli Berdimuhamedovga yaratgandan marhamat so‘rayman. Prezidentga, shuningdek, do‘stona va qardosh Turkmaniston xalqiga hamdardlik bildiraman ”, — deb yozdi Oqtay Twitter’da.
Shuningdek, Turkiya tashqi ishlar vaziri Mevlut Chavusho‘g‘li o‘zining Twitter’dagi sahifasida “Yaratgandan Malikguli Berdimuhamedovga marhamat” tilab, “do‘stona va qardosh Turkmaniston xalqi va hukumati” ga hamdardlik bildirdi.
18-aprel, yakshanba kuni Turkmaniston prezidenti Gurbanguli Berdimuhamedovning otasi Malikguli Berdimuhamedov 89 yoshida vafot etdi. Malikguli Berdimuhamedov mamlakat Ichki ishlar vazirligi organlarida ishlab, Toshhovuz, Mari, Ashxobod shaharlarida turli lavozimlarni egallagan.
1982-yilda podpolkovnik unvoni bilan iste’foga chiqqach, ko‘p yillar davomida Milliy ta’lim institutida, Pedagogik fanlar ilmiy-tadqiqot institutida, Ashxobod ta’lim boshqarmasida ishlagan, dars bergan.
2012-yil fevralida Turkmaniston Majlisi (parlamenti) qarori bilan, poytaxtdagi 1001-sonli harbiy qismga Malikguli Berdimuhamedov nomi berilgan edi.
2017-yilda Malikguli Berdimuhamedov nomidagi medal ta’sis etilgan va shu yili davlat rahbari o‘z otasiga va uning IIVdagi faoliyatiga bag‘ishlangan “Mardlar Vatanni ulug‘laydi” kitobini taqdim etgan edi.
Izoh (0)