Rossiya Tashqi ishlar vazirligi Moskvadagi Chexiya elchixonasining 20 nafar diplomatini persona non grata (xush ko‘rilmagan inson) deb e’lon qildi. Ularning barchasi 19-aprel oxirigacha Rossiyani tark etishi kerak, deb yozadi Meduza.
18-aprel, yakshanba kuni kechqurun Chexiya Respublikasining elchisi Vitezslav Pivonka zudlik bilan Rossiya Tashqi ishlar vazirligiga chaqirildi va rossiyalik diplomatlarni Pragadan chiqarib yuborilishiga javoban ko‘rilgan mazkur choralari to‘g‘risida xabardor qilindi.
Avvalroq Chexiya Pragadagi Rossiya elchixonasida ishlayotgan barcha — 18 nafar rossiyalik diplomatni ortga qaytarib yuborgan edi. Chexiya tashqi ishlar vazirining bayonotiga ko‘ra, diplomatlarning hammasi Rossiya maxsus kuchlarining ofitserlari ekanligi Chexiya razvedkasi tomonidan aniqlangan.
Chexiya, shuningdek, Rossiya maxsus xizmatlarini 2014-yilda Vrbetitsa shahridagi harbiy omborlarda sodir bo‘lgan portlashlarga aloqadorlikda ayblagan. Rossiyalik Aleksandr Petrov va Ruslan Boshirov portlashlarni uyushtirishda gumon qilinib, qidiruvga berilgan. Avvalroq Buyuk Britaniya ularni Solsberida Sergey va Yuliya Skripallarni zaharlagan Rossiya maxsus xizmatlari xodimlari deb atagan edi.
Moskva Praganing mazkur ayblovlarini bema’ni va asossiz deb atab, “qattiq norozilik” e’lon qildi.
“Ushbu dushmanona qadam aslida Chexiya tomonidan Rossiyaga qarshi so‘nggi yillarda amalga oshirilgan harakatlarning davomi. Bu ayblovlarda Amerika izini ham ko‘rmaslik mumkin emas. Yaqinda Amerikaning Rossiyaga qarshi sanksiyalar joriy qilishi fonida, AQShga xushomad qilishni maqsad qilgan Chexiya rasmiylari bu borada hatto amerikaliklarning o‘zidan ham o‘tib ketdi. Biz ushbu provokatsiya mualliflarini mamlakatlarimiz o‘rtasidagi munosabatlarning normal rivojlanish asoslarini yo‘qqa chiqarishda butunlay o‘zlari javobgar ekanini anglashga majbur qiladigan javob choralarini ko‘ramiz”, — deyiladi Moskva bayonotida.
Avvalroq Rossiya Ukraina konsulini mamlakatda maxfiy axborotni sotib olishga uringani uchun ortga qaytarish qaror qilgandi. Ukraina ushbu harakatga javoban Kiyevdagi Rossiya elchixonasi katta diplomatini vataniga qaytargan.
AQSh Rossiyaga nisbatan qo‘llagan yangi sanksiyalardan keyin Moskva 10 nafar amerikalik, 5 nafar polshalik diplomatni Vashington va Varshavaga qaytargan. Shuningdek, Rossiya TIV 8 nafar amaldor va avval hukumat tizimida ishlagan shaxslarga nisbatan taqiqlar qo‘yilganini e’lon qilgandi.
Izoh (0)