Xorazmda qiziga ruhiy zo‘ravonlik qilgan ota 5 sutkaga qamaldi

Xorazm viloyati Xiva tumanida voyaga yetmagan qiziga tazyiq va zo‘ravonlik qilib kelgan otaga jazo tayinlandi, deb xabar beradi “Xabar.uz”.

Ma’lum qilinishicha, Xiva tumanida yashovchi voyaga yetmagan N. ismli qizning tuman IIB tomonidan tazyiq va zo‘ravonlikdan jabrlangan xotin-qizlar uchun beriladigan himoya orderi bo‘lishiga qaramay, ichkilikni kasb qilgan otasi va amakisi unga ruhiy zo‘ravonlik o‘tkazishda davom etgan.

Jabrlanuvchi sudga murojaat qilib, otasi unga nisbatan uyatsiz xatti-harakatlar qilishini, haqoratlashni davom ettirayotganini va amakisi janjal ko‘tarib, o‘ldirishini aytib tahdid qilganini bildirgan.

Jinoyat ishlari bo‘yicha Xiva tuman sudida tomonlar va guvohlarning ko‘rsatmasi eshitilib qaror qabul qilingan. Unga ko‘ra, ota va amakiga nisbatan Ma’muriy javobgarlik to‘g‘risidagi kodeksning 206-modda (ma’muriy nazorat qoidalarini buzish) 1-qismi bilan to‘g‘ri malakalangan deb hisoblangan.

Sud ayblanuvchilarning oilaviy, moddiy ahvoli va boshqa holatlarni inobatga olib, Ma’muriy javobgarlik to‘g‘risidagi kodeksning 245, 309, 310, 311-moddalarini qo‘llab, kodeksning 206-modda 1-qismida nazarda tutilgan huquqbuzarlikni sodir etgan deb topgan.

Sud qaroriga ko‘ra, ota va amakiga 5  sutka ma’muriy qamoq jazosi tayinlangan. Shuningdek, ma’muriy qamoqning har bir kuni uchun bazaviy hisoblash miqdorining 15 foizi qiymatida qamoq xarajatlari undirilishi belgilangan.

Avvalroq Termizda erkak maktab o‘quvchisini ikki marta zo‘rlagani, ammo huquqni muhofaza qilish idoralari bu ishni “tinchitib” yuborgani aytilayotgani, Navoiyda o‘g‘il tug‘magani uchun eri tomonidan muttasil haqoratlab kelingan ayol o‘zi va uch nafar farzandini poyezd tagiga tashlab, joniga qasd qilgani, Xorazmda esa 19 yoshli kelin o‘zini osib o‘ldirgani to‘g‘risida xabar berilgandi.