Namangan viloyati IIB ijtimoiy tarmoqlarda hijobdagi o‘quvchi qizlarning huquq-tartibot idorasi xodimi qarshisida turgani aks etgan suratga munosabat bildirdi.
Ma’lum qilinishicha, 8-aprel kuni Yangiqo‘rg‘on tumanidagi 10-sonli maktab tomonidan tuman IIBga aloqa xati yuborilgan.
Unda maktabda avvaliga 5 nafar, oxirgi kunlarda 10 nafar qizlar belgilangan tartibdagi maktab formasini kiyib yurish qoidalariga rioya qilmayotgani, ularga bir necha marotaba maktab formasida, lozim bo‘lsa, oddiy ro‘mol o‘rab kelishlari to‘g‘risida tushuntirilgani, biroq ota-onalar ham, qizlar ham maktabning ichki tartib-qoidalariga rioya qilmayotgani ma’lum qilingan.
10-aprel kuni ushbu maktabda targ‘ibot va tashviqot ishlarini olib borish maqsadida 9—11-sinflar o‘rtasida jinoyat sodir etilishining oldini olish yuzasidan muhokama yig‘ilishi tashkil etilgan.
Muhokama davomida aloqa xatida ko‘rsatilgan qizlar bilan profilaktik suhbatlar o‘tkazilgan va ularga Vazirlar Mahkamasining 2018-yil 15-avgustdagi 666-sonli qarori tushuntirilgan.
“Suhbat yakunida o‘quvchi qizlarga maktabga belgilangan tartibda kiyinib kelishlari, hijobda emas ro‘mol o‘rashlari mumkinligi, bunga hech kim qarshilik ko‘rsatmasligi tushuntirib o‘tilgan”, — deyiladi munosabatda.
Eslatib o‘tamiz, hukumatning mazkur 666-sonli qarorida 2018/2019-o‘quv yilidan boshlab o‘quvchilarning davlat umumiy o‘rta ta’lim muassasasiga 1-ilovaga muvofiq tasdiqlangan shakllardagi maktab formasida kelishlari ixtiyoriy, 2024/2025-o‘quv yilidan boshlab esa majburiy hisoblanadi.
Mavzuga doir:
- “Qizim hijobda kelishiga ruxsat berilmasa, otasi o‘zini osib qo‘yadi”. Toshkent XTBB onani tahdid qilganlikda ayblamoqda
- Sherzod Shermatov Izboskanda maktab direktori ro‘mol o‘ragan o‘quvchiga “qamataman” deb tahdid qilgani aytilgan murojaatga munosabat bildirdi
- Oliy va o‘rta ta’lim vaziri oliy ta’lim muassasalarida hijob o‘rab yurish masalasiga izoh berdi
Izoh (0)