Хоразмда қизига руҳий зўравонлик қилган ота 5 суткага қамалди

Хоразм вилояти Хива туманида вояга етмаган қизига тазйиқ ва зўравонлик қилиб келган отага жазо тайинланди, деб хабар беради «Xabar.uz».

Маълум қилинишича, Хива туманида яшовчи вояга етмаган Н. исмли қизнинг туман ИИБ томонидан тазйиқ ва зўравонликдан жабрланган хотин-қизлар учун бериладиган ҳимоя ордери бўлишига қарамай, ичкиликни касб қилган отаси ва амакиси унга руҳий зўравонлик ўтказишда давом этган.

Жабрланувчи судга мурожаат қилиб, отаси унга нисбатан уятсиз хатти-ҳаракатлар қилишини, ҳақоратлашни давом эттираётганини ва амакиси жанжал кўтариб, ўлдиришини айтиб таҳдид қилганини билдирган.

Жиноят ишлари бўйича Хива туман судида томонлар ва гувоҳларнинг кўрсатмаси эшитилиб қарор қабул қилинган. Унга кўра, ота ва амакига нисбатан Маъмурий жавобгарлик тўғрисидаги кодекснинг 206-модда (маъмурий назорат қоидаларини бузиш) 1-қисми билан тўғри малакаланган деб ҳисобланган.

Суд айбланувчиларнинг оилавий, моддий аҳволи ва бошқа ҳолатларни инобатга олиб, Маъмурий жавобгарлик тўғрисидаги кодекснинг 245, 309, 310, 311-моддаларини қўллаб, кодекснинг 206-модда 1-қисмида назарда тутилган ҳуқуқбузарликни содир этган деб топган.

Суд қарорига кўра, ота ва амакига 5  сутка маъмурий қамоқ жазоси тайинланган. Шунингдек, маъмурий қамоқнинг ҳар бир куни учун базавий ҳисоблаш миқдорининг 15 фоизи қийматида қамоқ харажатлари ундирилиши белгиланган.

Аввалроқ Термизда эркак мактаб ўқувчисини икки марта зўрлагани, аммо ҳуқуқни муҳофаза қилиш идоралари бу ишни «тинчитиб» юборгани айтилаётгани, Навоийда ўғил туғмагани учун эри томонидан муттасил ҳақоратлаб келинган аёл ўзи ва уч нафар фарзандини поезд тагига ташлаб, жонига қасд қилгани, Хоразмда эса 19 ёшли келин ўзини осиб ўлдиргани тўғрисида хабар берилганди.