Xorazmning Shovot tumanida 19 yoshli kelin o‘zini osib o‘ldirdi. Bu haqda Bosh prokuratura “Xalq so‘zi Online”ga ma’lum qildi.

Unda aytilishicha, viloyatning Shovot tumanida tug‘ilgan 19 yoshli Q.M. 1-aprel kuni soat 11:00 da o‘z uyidagi molxonaning yog‘och to‘siniga oq rangli shpagat ip bilan o‘zini o‘zi osib, o‘z joniga qasd qilgan. O‘lim sabablarini aniqlash maqsadida Respublika sud-tibbiy ekspertizasi ilmiy-amaliy markaziga sud-tibbiy ekspertiza tayinlanib, murda tekshiruvdan o‘tkazilgan. Dastlabki ekspert ma’lumotiga ko‘ra, uning o‘limiga o‘zini o‘zi osishi natijasidagi asfiksiya sabab bo‘lgan.

Marhuma 2020-yil oktabr oyida 2001-yil avgustda tug‘ilgan M.Ya. bilan turmush qurib, uning oilasi bilan “Katqal’a” mahallasida istiqomat qilib kelgan.

Dastlabki to‘plangan hujjatlarga ko‘ra kelin va uning oila a’zolari turmushi davomida huquqni muhofaza qiluvchi organlarga yoki mahalla fuqarolar yig‘iniga shikoyat qilmagan. Uning turmush o‘rtog‘i M.Ya. yoki oila a’zolari muqaddam sudlanmagan, notinch oila yoki boshqa bir holatlar yuzasidan ro‘yxatda turmaydi.

“Hozirda tergovga qadar tekshiruv harakatlari olib borilayotgan bo‘lib, yakuni yuzasidan qonuniy qaror qabul qilinishi ta’minlanadi”, — deyiladi xabarda.

Eslatib o‘tamiz, 2020-yilning iyul oyida Qashqadaryoda 18 yoshli juvon uyidan osilgan holda topilgan, marhumaning onasi qizining o‘limida kuyovini ayblagan. O‘sha yilning oktabr oyida Samarqandda er 24 yoshli xotinini bo‘g‘ib o‘ldirib, arqonga osib qo‘ygani, noyabr oyida Buxoroda xotinini o‘z-o‘zini o‘ldirish darajasiga yetkazgan er 7 yil-u 6 oyga qamalgandi.  Shuningdek, Toshkentda xotinini bolasining axlatini yeyishga majbur qilgan erkak va Xorazmda oilaviy janjal oqibatida xotinini bo‘g‘ib o‘ldirib qo‘ygan erkak qo‘lga olingani xabar qilingandi.