Navoiy viloyati Navbahor tumanidan o‘tuvchi yo‘lda Nexia-3’ning yo‘ldan chiqib ketib, ag‘darilishi oqibatida uch nafar fuqaro vafot etdi. Bu haqda “Daryo”ga viloyat IIB YHXB matbuot guruhi rahbari Farrux Yakubov xabar berdi.
Ta’kidlanishicha, 2021-yilning 11-aprel kuni taxminan soat 18:20 larda fuqaro Z.H. o‘ziga tegishli Nexia-3 rusumli transport vositasida Navbahor tumani hududidan o‘tuvchi 4R57 avtomobil yo‘lida harakatlanib kelgan. Shu yo‘lning 22, 23-kilometrlari oralig‘ida Nurota–Navbahor yo‘nalishida ehtiyotsizligi oqibatida boshqaruvni yo‘qotgan.
Natijada avtomobil yo‘ldan chiqib ketib, ag‘darilgan. Avtomashina haydovchisi Z.H. hamda yo‘lovchisi J.R. og‘ir tan jarohati olib, voqea joyida vafot etgan.
Yo‘lovchi U.B. esa og‘ir tan jarohati bilan Navbahor tumani tibbiyot birlashmasiga olib kelingan. Ko‘rsatilgan tezkor tibbiy yordam va muolajalarga qaramay, u ham vafot etgan.
Mazkur holat yuzasidan Jinoyat kodeksining 266-moddasi 3-qismi (odamlar o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.
Bundan avval Toshkentda Malibu va Lacetti to‘qnashuvi oqibatida Ozarbayjon fuqarosi vafot etgani, Farg‘onada Lacetti yo‘lni kesib o‘tayotgan 12 yoshli velosipedchini urib ketgani hamda Namanganda Spark ag‘darilib ketishi oqibatida bir kishi vafot etgani haqida xabar berilgandi.
Izoh (0)