Buyuk Britaniyada BMW 6-Series kabrioletining haydovchi o‘rindig‘ini isitish tizimi nafaqat o‘rindiq qoplamasini, balki haydovchining sviterini ham kuydirib yubordi, deb xabar beradi Motor.
Daily Mail nashrining yozishicha, E64 avlodiga kiradigan BMW 650i Convertible’ga egalik qiluvchi britaniyalik Devid March jurnalistlarga avtomobildagi xavfli nuqsondan shikoyat qilgan. Uning ta’kidlashicha, haydovchi o‘rindig‘ini isitish tizimining nosozligi nafaqat o‘rindiqning charm qoplamasini, balki uning kiyimini ham kuydirib yuborgan. Bunga isbot sifatida 2007-yilgi qora kabriolet egasi kuyish oqibatida ikkita teshik paydo bo‘lgan junli to‘q ko‘k sviterini ko‘rsatgan. Marchning so‘zlariga ko‘ra, u savdo markazidagi avtoturargohda mashina ichida o‘tirib, rafiqasining do‘kondan chiqishini kutgan va beli kuyayotganini sezib qolgan.
Avtomobildan tushib qaraganida, haydovchi o‘rindig‘ining yon qismida va sviterida teshik paydo bo‘lganini ko‘rgan. March sodir bo‘lgan voqeadan juda g‘azablangan, biroq mahalliy diler mutaxassislari ishlab chiqarilganiga 14 yil bo‘lgan va 145 ming kilometr yo‘l bosgan 650i Convertible’ning kafolat ta’miri haqida gap bo‘lishi ham mumkin emasligini ma’lum qilgan. Britaniyalik BMW’dan ushbu holat bo‘yicha mashinalarni chaqirib olish kampaniyasini tashkillashtirishni talab qilmoqda. Bavariya kompaniyasi bunga qadar 2003—2004-yilda ishlab chiqarilgan mashinalarida ham xuddi shu kabi muammolar kuzatilgani sabab bir necha modellarini qaytarib olgan edi.
Eslatib o‘tamiz, 2018-yilda BMW avtomobillarga gaz chiqindilari ko‘rsatkichlarini kamaytirib ko‘rsatuvchi dasturlar o‘rnatganini tan olgandi.
Mavzuga doir: BMW AQShda qariyb 1,4 millionta mashinani chaqirib oladi
Izoh (0)