RM Sotheby’s auksioni orqali aprel oxirida noyob va qimmatbaho lot — afsonaviy Bugatti EB110 superkarining to‘rtta original g‘ildirak diskalari jamlanmasi sotuvga qo‘yiladi, deb xabar beradi Motor.
Bugatti EB110 superkarining to‘rtta g‘ildirakdan iborat g‘ildirak diskalari RM Sotheby’s auksioni orqali sotiladi. Onlayn savdolar 21-aprel kuni boshlanib, 29-aprel kuni yakunlanadi. BBS tomonidan ishlab chiqarilgan ikki komponentli quyma diskalarni kimoshdi uyi 8-12 ming yevroga sotishni rejalashtirgan. Auksion rejalashtirgan yuqori narx hisobga olinadigan bo‘lsa, bu pulga yangi Lacetti Gentra xarid qilish mumkin.
Diskalar diametri 18 dyuym bo‘lib, old qismining eni — 9, orqasidagi— 12 dyuymni tashkil etadi. Lot Kopengagenda joylashgan bo‘lib, uni Daniyadan olib kelish uchun ham yana qo‘shimcha mablag‘ to‘lashga to‘g‘ri keladi.
1991-yildan 1995-yilga qadar Bugatti EB110’ning GT va Super Sport versiyalaridan mos ravishda 96 va 32 nusxa ishlab chiqarilgan. Superkarga 3,5 litrli to‘rtta turbokompressorga ega V12 motori o‘rnatilgan. EB110 GT’ning standart modifikatsiyasi 560 ot kuchini taqdim etishga qodir bo‘lib, soatiga 100 kilometr tezlikka 3,5 soniyada erishadi. Maksimal tezligi — 336 kilometr/soat.
Super Sport versiyasiga esa 611 ot kuchiga ega motor o‘rnatilgan bo‘lib, soatiga 100 kilometr tezlikka 3,3 soniyada erishadi. Maksimal tezligi — 351 kilometr/soat.
Avvalroq AQShda Chevrolet Suburban’ning plastik “kolpagi” yangi Mercedes-Benz S-Class narxida sotuvga qo‘yilgani to‘g‘risida xabar berilgandi.
Izoh (0)