Internet tarmog‘ida tarqalgan 15 soniyalik videoda Toshkent shahar IIBB YHXB YPX inspektori va haydovchi o‘rtasidagi kelishmovchilik suratga tushirilgan. Voqea bo‘yicha Toshkent shahar IIBB ma’lumot berdi.
Qayd etilishicha, 2021-yil 11-aprel kuni taxminan soat 20:40 da YPX 2-bataloni 6-mobil guruhi inspektori kichik serjant J.H. Mirobod tumani Nukus va Glinka ko‘chalari kesishmasida xizmat olib borish davomida kechki vaqtga qaramasdan yorug‘lik moslamalari yoqilmagan Matiz (davlat raqami 10 L 568 PA) rusumli avtomobilni ko‘rib qolgan.
Mazkur holat Yo‘l harakati qoidalarining 134-bandi (qorong‘i vaqtda va yetarlicha ko‘rinmaydigan sharoitda yorug‘lik vositalarini yoqib yurish) bo‘yicha qoidabuzarlik bo‘lib, Ma’muriy javobgarlik to‘g‘risidagi kodeksning 128-moddasi (haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) bo‘yicha huquqbuzarlik hisoblanadi.
Avtomobil haydovchisiga to‘xtash haqida ishora berilganiga qaramasdan, u Toshkent shahar IIBB xodimining talabiga bo‘ysunmagan. Inspektor bu haqda yo‘nalish bo‘yicha xizmat olib borilayotgan xodimlarga ratsiya orqali xabar berdi.
YPX 2-bataloni 4-mobil guruhi katta inspektor mayor U.I. tomonidan ko‘rilgan choralar natijasida transport vositasi Nukus ko‘chasidagi Makro supermarketi yonida to‘xtatildi. Avtomobilni ishonchnoma asosida boshqargan 32 yoshli Sh.I. to‘xtatilgani uchun yo‘l harakati qoidalariga va yo‘l harakati xavfsizligi xizmati xodimining harakatlariga norozilik bildirib, inspektorni haqoratlab, qonunchilikka nisbatan hurmatsizlik qilgan.
Haydovchiga nisbatan Ma’muriy javobgarlik to‘g‘risidagi kodeksning 194-moddasi (ichki ishlar organlari xodimining qonuniy talablarini bajarmaslik) bo‘yicha bayonnoma rasmiylashtirilib, uning avtomobili jarima maydonchasiga joylandi.
Bundan avval Andijonda “tonirovka”si uchun to‘xtatilgan Nexia haydovchisi YPX inspektori bilan janjallashgani, Toshkent viloyatida “GAIning duxini sindirmoqchi” bo‘lgan haydovchi 15 sutkaga qamalgani hamda Toshkentda qoidabuzar avtoblogerni chora ko‘rmay qo‘yib yuborgan YPX xodimi va uning boshlig‘iga chora ko‘rilgani haqida xabar berilgandi.
Izoh (0)