Hindiston koronavirus yuqtirganlar soni bo‘yicha dunyoda 2-o‘ringa chiqdi. Mamlakat COVID-19’ni davolovchi “Remdesivir” dorisini eksport qilishni to‘xtatdi

Hindiston COVID-19’ga chalinganlar sonining ko‘pligi bo‘yicha dunyoda ikkinchi o‘ringa chiqdi. Bu haqda Times of India nashriga tayanib, “Interfaks” xabar berdi.

Hindiston Sog‘liqni saqlash vazirligining ma’lumotlariga ko‘ra, so‘nggi bir kun ichida mamlakatda virus yuqtirish bo‘yicha 168,9 mingta yangi holat qayd etildi, 904 kishi kasallikdan vafot etdi.

Umumiy hisobda pandemiya boshlanganidan beri Hindistonda 13,53 million kishi koronavirus bilan kasallangan.

Shu paytgacha infeksiya yuqtirganlar sonining ko‘pligi bo‘yicha dunyoda ikkinchi o‘rinni Braziliya egallab turgan edi (13,45 million holat). Birinchi o‘rinda 31,2 million kishi bilan AQSh hamon yetakchilik qilmoqda.

Hindiston hukumati koronavirus kasalligini davolashda keng qo‘llaniladigan “Remdesivir” preparatiga mamlakat ichida talab oshgani sababli dori eksportini taqiqladi.

“So‘nggi kunlarda Hindistonda COVID-19’ga chalinish holatlari ko‘paymoqda. Bu esa  koronavirusni davolash uchun ishlatiladigan ‘Remdesivir’ preparatiga talabning keskin o‘sishiga olib keldi”, — deyiladi hukumat bayonotida. Hindiston hukumati kelgusida ushbu dori vositalariga talab oshishi mumkinligini taxmin qilmoqda.

“Yuqoridagilarni inobatga olgan holda, Hindiston hukumati inyeksiya yo‘li bilan yuboriladigan ‘Remdesivir’ va uning faol farmatsevtik tarkibiy qismlarining eksportini vaziyat yaxshilanguniga qadar taqiqladi”, — deyiladi bayonotda.

OAV ma’lumotlariga ko‘ra, mamlakatda mazkur preparatni ishlab chiqarish bilan yettita kompaniya shug‘ullanadi.

“Remdesivir” Yevropa Ittifoqida ruxsat olish uchun tavsiya qilingan koronavirusga qarshi ilk dori vositasi hisoblanadi. Janubiy Koreya ham 1-iyuldan boshlab “Remdesivir” dori vositasini sotib olishni boshlagandi. O‘zbekistonda ham profilaktika, kasallikning yuqishini oldini olish maqsadida ishlatish mumkin bo‘lgan dorilar qatorida “Remdesivir” bor. JSST “Remdesivir”ni koronavirusga qarshi kurashda “umid uyg‘otuvchi” dori vositasi deb atagan. Preparat koronavirus ko‘payishini bloklash xususiyatiga ega ekani kanadalik olimlar tomonidan aprel oyida aniqlangandi. AQSh “Remdesivir” preparatining deyarli barcha zaxirasini sotib olayotganini ma’lum qilgandi.

Jahon sog‘liqni saqlash tashkiloti (JSST) esa COVID-19’ni davolash uchun “Remdesivir”ni qo‘llashga qarshi chiqdi. JSST ma’lumotlariga ko‘ra, tashkilot mutaxassislari ayni paytda “ushbu dori bemorlarda yashovchanlikni yaxshilashi va boshqa xususiyatlari isbotlanmagani” sababli doridan foydalanishga qarshi.