Ҳиндистон коронавирус юқтирганлар сони бўйича дунёда 2-ўринга чиқди. Мамлакат COVID-19’ни даволовчи «Ремдесивир» дорисини экспорт қилишни тўхтатди

Ҳиндистон COVID-19’га чалинганлар сонининг кўплиги бўйича дунёда иккинчи ўринга чиқди. Бу ҳақда Times of India нашрига таяниб, «Интерфакс» хабар берди.

Ҳиндистон Соғлиқни сақлаш вазирлигининг маълумотларига кўра, сўнгги бир кун ичида мамлакатда вирус юқтириш бўйича 168,9 мингта янги ҳолат қайд этилди, 904 киши касалликдан вафот этди.

Умумий ҳисобда пандемия бошланганидан бери Ҳиндистонда 13,53 миллион киши коронавирус билан касалланган.

Шу пайтгача инфекция юқтирганлар сонининг кўплиги бўйича дунёда иккинчи ўринни Бразилия эгаллаб турган эди (13,45 миллион ҳолат). Биринчи ўринда 31,2 миллион киши билан АҚШ ҳамон етакчилик қилмоқда.

Ҳиндистон ҳукумати коронавирус касаллигини даволашда кенг қўлланиладиган «Ремдесивир» препаратига мамлакат ичида талаб ошгани сабабли дори экспортини тақиқлади.

«Сўнгги кунларда Ҳиндистонда COVID-19’га чалиниш ҳолатлари кўпаймоқда. Бу эса  коронавирусни даволаш учун ишлатиладиган ‘Ремдесивир’ препаратига талабнинг кескин ўсишига олиб келди», — дейилади ҳукумат баёнотида. Ҳиндистон ҳукумати келгусида ушбу дори воситаларига талаб ошиши мумкинлигини тахмин қилмоқда.

«Юқоридагиларни инобатга олган ҳолда, Ҳиндистон ҳукумати инъекция йўли билан юбориладиган ‘Ремдесивир’ ва унинг фаол фармацевтик таркибий қисмларининг экспортини вазият яхшилангунига қадар тақиқлади», — дейилади баёнотда.

ОАВ маълумотларига кўра, мамлакатда мазкур препаратни ишлаб чиқариш билан еттита компания шуғулланади.

«Ремдесивир» Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади. Жанубий Корея ҳам 1 июлдан бошлаб «Ремдесивир» дори воситасини сотиб олишни бошлаганди. Ўзбекистонда ҳам профилактика, касалликнинг юқишини олдини олиш мақсадида ишлатиш мумкин бўлган дорилар қаторида «Ремдесивир» бор. ЖССТ «Ремдесивир»ни коронавирусга қарши курашда «умид уйғотувчи» дори воситаси деб атаган. Препарат коронавирус кўпайишини блоклаш хусусиятига эга экани канадалик олимлар томонидан апрель ойида аниқланганди. АҚШ «Ремдесивир» препаратининг деярли барча захирасини сотиб олаётганини маълум қилганди.

Жаҳон соғлиқни сақлаш ташкилоти (ЖССТ) эса COVID-19’ни даволаш учун «Ремдесивир»ни қўллашга қарши чиқди. ЖССТ маълумотларига кўра, ташкилот мутахассислари айни пайтда «ушбу дори беморларда яшовчанликни яхшилаши ва бошқа хусусиятлари исботланмагани» сабабли доридан фойдаланишга қарши.