Yevropa ayollari assotsiatsiyasi Anqaradagi kursi mojarosi munosabati bilan Yevropa Kengashi raisi Sharl Mishelning iste’fosini talab qildi. Mojaro Yevrokomissiya rahbari Ursula fon der Lyayyen uchun o‘rindiq yetmay qolgani sababli kelib chiqqan edi, deb yozadi “Korrespondent.net”.
Ta’kidlanishicha, assotsiatsiyasi tomonidan Mishelning shaxsan o‘ziga xuddi shu talab bilan xat yuborilgan. Shu tarzda Xotin-qizlarning imkoniyatlarini kengaytirish xalqaro xayriya fondi Yevropa Kengashi rahbarini Turkiyadagi xatti-harakatlari orqali “diplomatiya, Yevropa Ittifoqi va inson huquqlari, ayniqsa, ayollar huquqlari”ga zarar yetkazishda ayblamoqda.
“Arzimagan uzrlaringiz siz tufayli Yevropada mintaqa fuqarolariga nisbatan, shuningdek, aksariyat OAV ushbu voqeani mazax bilan ta’riflayotgan dunyoga nisbatan hosil bo‘lgan siyosiy bo‘shliqni to‘ldira olmaydi. Shuning uchun biz sizdan Yevropa Kengashi raisi lavozimidan ketishingizni so‘raymiz”, — deyiladi xatda.
Nashrning yozishicha, 11-aprel oqshomigacha Belgiya, Fransiya, Italiya va Yevropa Ittifoqiga a’zo bo‘lmagan mamlakatlardan 4 mingga yaqin aholi iste’fo to‘g‘risidagi petitsiyani imzolagan.
Hujjatda ta’kidlanishicha, Sharl Mishel ushbu voqea orqali Ursula fon der Lyayyen bilan bir qatorda “barcha ayollarni haqorat qilgan”.
Eslatib o‘tamiz, Turkiyaning Anqara shahrida mamlakat prezidenti Rajab Toyyib Erdo‘g‘on va Yevropa Kengashi rahbari Sharl Mishel bilan bo‘lgan uchrashuvda Yevropa komissiyasi rahbari Ursula fon der Lyayyenga kursi yetmay qoldi. Tasvirda siyosatchilarning o‘z o‘rinlarini egallagani, fon der Lyayyen esa ularning ortidan kirib bo‘sh o‘rindiq topa olmaganini ko‘rish mumkin. Lekin vaziyat darhol bartaraf etildi, Yevrokomissiya raisi xonada turgan divandan joy egalladi.
Keyinroq Yevroittifoq Turkiyada Yevrokomissiya rahbariga kursi yetishmay qolishi bilan bog‘liq voqeaga munosabat bildirdi.
Izoh (0)