COVID-19 tashxisi bilan kasalxonaga yotqizilgan bemorlarga kasallikning og‘irlik darajasidan qat’i nazar, “Remdesivir” dorisini qo‘llash kerak emas. Shunday tavsiya bilan Jahon sog‘liqni saqlash vazirligi chiqdi, deb yozadi “RBK”.

JSST ma’lumotlariga ko‘ra, tashkilot mutaxassislari ayni paytda “ ushbu dori bemorlarda yashovchanlikni yaxshilashi va boshqa xususiyatlari isbotlanmagani” sababli doridan foydalanishga qarshi.

“Remdesivir” boshqa vositalar bilan birgalikda Amerika prezidenti Donald Trampni davolashda qo‘llanilgan edi. Oktabrda koronavirusga chalinib, so‘ng sog‘aygan prezident AQShning barcha fuqarolariga xuddi o‘zi kabi davolanish bilan ta’minlashni va’da qilgan edi.

JSSTning dorini qo‘llashga qarshi tavsiyalari Magic Evidence Ecosystem Foundation (MAGIC) notijorat tashkiloti bilan hamkorlikda ishlab chiqilgan. Ekspert guruhiga klinik yordam sohasidagi 28 mutaxassis, to‘rt bemor va axloq qoidalari bo‘yicha bir mutaxassis kirgan.

“Remdesivir”ning samaradorligini tekshirish 15-oktabr kuni boshlangan. Jami to‘rtta mustaqil sinov o‘tkazilgan, ularda 7 mingdan ortiq bemorga tegishli ma’lumotlar tahlil qilib chiqilgan. Oxir-oqibat, ekspertlar dori COVID-19’ga chalingan odamlarning yashovchanligiga, sun’iy nafas oldirish, sog‘ayib ketish vaqtiga va boshqa ko‘rsatkichlarga ahamiyatli tarzda ta’sir o‘tkazmaydi, degan xulosaga keldi.

Koronavirus infeksiyasini “Remdesivir” tajribaviy dorisi bilan davolash bemorlarning o‘lim soniga sezilarli darajada ta’sir o‘tkazmasligi haqida JSST avval ham aytgan edi. JSST 11,2 ming bemorni davolash jarayonini tekshirib, shunday xulosaga keldiki, hech qaysi dori bemorning yashab ketish imkoniyatlariga ta’sir o‘tkazmagan va sun’iy nafas oldirishga ehtiyojni pasaytirmagan. Bunda gap nafaqat “Remdesivir”, balki “Gidroksixloroxin”, “Lopinavir” va “Interferon” haqida ham bormoqda. Bundan tashqari, JSST tadqiqoti bu dorilar COVID-19’ga chalingan bemorning kasalxonada yotish vaqtini deyarli qisqartirmasligini ko‘rsatdi.

Avvalroq Jahon sog‘liqni saqlash tashkiloti (JSST) rahbari Tedros Gebreyesus “Deksametazon” – COVID-19’ga qarshi kurashda samarali ekani isbotlangan yagona dori vositasi ekanligini ma’lum qilgandi. AQSh prezidenti Donald Trampni davolashda ham ishlatilgan.

“Remdesivir” Amerikaning Gilead Sciences farmakologik kompaniyasi tomonidan dastlab Ebola bezgagiga qarshi vosita sifatida ishlab chiqarilgan. Apreldagi sinovlardan keyin u AQShda va Yevroittifoqda COVID-19 bilan kasallanish holatida qo‘llash uchun ma’qullandi. AQSh Milliy salomatlik institutlari “Remdesivir” davolanish vaqtini o‘rtacha 15 kundan 11 kungacha qisqartirishini aytgan edi. Gilead Sciences iyulda e’lon qilgan ma’lumotlarga ko‘ra, dori koronavirusdan vafot etish ehtimolini kamaytiradi. Ammo bular nazorat tadqiqoti tomonidan tasdiqlanmadi.

Eslatib o‘tamiz, “Remdesivir” Yevropa Ittifoqida ruxsat olish uchun tavsiya qilingan koronavirusga qarshi ilk dori vositasi hisoblanadi. Janubiy Koreya ham 1-iyuldan boshlab “Remdesivir” dori vositasini sotib olishni boshlagandi. O‘zbekistonda ham profilaktika, kasallikning yuqishini oldini olish maqsadida ishlatish mumkin bo‘lgan dorilar qatorida “Remdesivir” bor. JSST “Remdesivir”ni koronavirusga qarshi kurashda “umid uyg‘otuvchi” dori vositasi deb atagan. Preparat koronavirus ko‘payishini bloklash xususiyatiga ega ekanligi kanadalik olimlar tomonidan aprel oyida aniqlangandi. AQSh “Remdesivir” preparatining deyarli barcha zaxirasini sotib olayotganini ma’lum qilgandi.

AQSh prezidenti Donald Tramp ham koronavirusdan “Remdesivir” dorisi orqali davolangan. Amerika prezidentini davolovchi shifokor Shon Konlining ma’lum qilishicha, Trampning organizmida kislorod darajasi 93 foizgacha tushib ketganidan so‘ng “Deksametazon” qo‘llanilgan. Shifokorlar steroidni 3-oktabr kuni “Remdesivir” preparatining ikkinchi dozasi bilan birga qo‘llashni boshlagan, Trampda ikkilamchi ta’sirlar aniqlanmagan.