Saudiya Arabistonida 11-aprel, yakshanba kuni hech kim yangi Oy chiqishiga guvoh bo‘lmadi, shu sababli mamlakat Oliy sudi qaroriga ko‘ra, Fors ko‘rfazi mamlakatlarida musulmonlarning muqaddas Ramazon oyi dushanba kuni boshlanmaydi. Bu haqda SPA agentligida keltirilgan sudning bayonotiga tayanib, Tengrinews xabar berdi.
“Yangi hilolning paydo bo‘lishini ko‘rishning iloji bo‘lmadi. Shu sababli sud ertaga tunda yig‘ilib, Ramazon oyining boshlanishi to‘g‘risida qaror qabul qiladi”, — deyiladi xabarda. Boshqa ko‘plab arab davlatlari garchi o‘z astronom va ilohiyotchilarining ko‘rsatmalariga tayanib ish tutsa ham, bu masalada Saudiya Arabistoniga ergashadi.
Qatarning Vaqf va islom ishlari vazirligi bayonotida ta’kidlanishicha, “Sha’bon oyining 29-kuni (yakshanba), yangi Oyning osmonda paydo bo‘lishini kuzatish to‘g‘risidagi qo‘mitaning chaqirig‘iga hech kim javob bermadi, shuning uchun qo‘mita o‘z ishini dushanba kuni davom ettiradi va o‘sha kuni o‘z fikrini aytadi”.
Xabarga ko‘ra, Misr, Iroq, Tunis, Livan, Kuvayt, Yaman, Ummon, Birlashgan Arab Amirliklarida ham dushanba kuni ro‘za oyi boshlanmaydi.
Agar yangi Oyning chiqishi dushanba kuni ham kuzatilmasa, ko‘plab arab mamlakatlarida Ramazon seshanba kuni — 30 kunlik sha’bon oyi tugaganidan keyin boshlanishi mumkin. Shuningdek, ba’zi mamlakatlarda, xususan, Saudiya Arabistonida changli ob-havo tufayli o‘tgan yangi Oyni ko‘rishning iloji bo‘lmagani tufayli sha’bon oyining boshlangan sanasi haqida shubhalar mavjud, shuning uchun Ramazon chorshanba kuni kelishi ham mumkin.
2021-yil Ramazon Fors ko‘rfazi mamlakatlarida, 2020- yilgidek koronavirus pandemiyasi fonida qattiq cheklovlar ostida o‘tkaziladi. Kuvayt va Ummonda tundan tonggacha komendantlik soati o‘rnatilgan, Qatarda esa Ramazon oldidan do‘konlar va dorixonalardan tashqari deyarli barcha muassasalar yopilgan edi, mamlakatda parklar, qirg‘oqlar va plyajlarga borish taqiqlanadi, yakka sport turlari bundan mustasno.
Ramazonda dindorlar an’anaviy tarovih namozini masjidlarda emas, balki uyda o‘qishi kerak bo‘ladi. Fors ko‘rfazidagi barcha mamlakatlarda an’anaviy Ramazon chodirlari bekor qilingan, bunday chodirlarda ro‘zadan keyin katta yig‘in uyushtirilib, iftorlik qilish odat tusiga kirgan edi. Shuningdek, yopiq joylarda va ko‘chalarda ovqat tarqatish, iftorlik va saharlik uchun mehmonga borish taqiqlangan.
O‘zbekistonda Ramazon oyining boshlanishi 13-aprel etib belgilandi. Ramazon oyida O‘zbekistondagi 1400 ga yaqin masjidda Qur’oni karim xatm qilinishi ma’lum qilingan. Shuningdek, O‘zbekiston musulmonlari idorasi ro‘zadorga makruh bo‘lgan amallarni eslatib o‘tdi.
Izoh (0)