Gruziya koronavirus pandemiyasining uchinchi to‘lqiniga duch keldi, deya ma’lum qildi mamlakat kasalliklar va jamoatchilik sog‘lig‘i ustidan nazorat milliy markazi rahbari Amiran Gamkrelidze. “Mamlakatda uchinchi to‘lqin boshlanib bo‘ldi, ammo keng ko‘lamli epidemiya yuzaga kelmasligi uchun u maksimal darajada boshqariluvchan bo‘lishini xohlardik”, — dedi u.
Infeksiyaning faol tarqalishiga aholining to‘ylar, ma’rakalar, tug‘ilgan kunlar va boshqa tadbirlar bahonasida ommaviy yig‘ilishlari sabab bo‘lmoqda, dedi u. Bundan tashqari, Gamkrelidzening aytishicha, so‘nggi vaqtlarda virus bilan kasallanish holatlarining ko‘pchiligi COVID-19’ning “britancha” shtammi bilan bog‘liq bo‘lmoqda.
So‘nggi ma’lumotlarga ko‘ra, jami aholisi 4 million kishiga teng bo‘lgan Gruziyada pandemiya boshidan buyon 288 ming kishi kasallangan, shularning 3877 nafari vafot etgan.
So‘nggi bir kecha-kunduzda mamlakatda 707 kishi koronavirusni yuqtirib oldi (bir kun avval — 506 kishi).
Gruziyada COVID-19’ga qarshi emlash 15-martda boshlangan edi.
Germaniyada pandemiya boshidan buyon koronavirus tasdiqlangan kishilar soni 3 milliondan oshdi. Robert Kox instituti ma’lumotlari shu haqda guvohlik bermoqda. Jons Hopkins universiteti ma’lumotlari bo‘yicha ham Germaniyada kasallanganlar soni 3 millionlik marradan o‘tib, 3 015 475 kishiga yetgan.
O‘tgan bir kecha-kunduzning o‘zida 13 245 kishi virusni yuqtirib olgan, 99 kishi vafot etgan. Koronavirus oqibatida vafot etganlarning umumiy soni 78 452 kishiga yetdi. 2 683 900 kishi esa sog‘aydi.
Koronavirusga qarshi Pfizer vaksinasining xarid bahosi Yevroittifoq uchun 12 yevrodan 19,5 yevrogacha ko‘tarildi. Bolgariya bosh vaziri Boyko Borisovning aytishicha, aynan shu narxda Yevrokomissiya Pfizer bilan 2022 va 2023-yillarda vaksina yetkazib berish bo‘yicha shartnoma imzolagan.
“Pfizer’da narx dastlab 12 yevro edi. Keyin 15,50 yevro bo‘ldi. Endi esa 900 million doza vaksinani 19,50 yevro narxda yetkazib berish haqida shartnomalar imzolanyapti”, — dedi Borisov.
U vaksinaning narxi haqida Pfizer Bolgariyaga 2,7 million doza vaksina yetkazishi haqida gapirayotib aytib o‘tdi. Aslida Yevroittifoq vaksinalar qiymatini oshkor qilmaydi — yetkazib beruvchi kompaniyalarning shartlari shuni talab qiladi.
Shuningdek, Chexiyada COVID-19 pandemiyasi tufayli kiritilgan favqulodda holat rejimi yakunlandi. 12-martdan buyon amal qilib kelgan favqulodda holat 11-aprel kuni yarim tunda nihoyasiga yetdi. Shu munosabat bilan mamlakatda maktablar, bog‘chalar, muzeylar, , hayvonot bog‘lari, sport muassasalari, do‘konlar, dorixonalar va bozorlar cheklangan rejimda ishlashni boshlaydi.
Niderlandiyada esa koronavirus tarqalishiga qarshi kurash doirasida cheklov choralarini 21-apreldan yumshatmaslikka qaror qilishdi. Avvalroq ushbu sanadan komendantlik soati bekor qilinib, kafe va restoranlar ayvonlari ochilishi kutilayotgan edi. “Buning uchun hali juda erta. Koronavirus bilan kasallanishning avj nuqtasidan o‘tib bo‘lganimizcha yo‘q”, — dedi vazirlar mahkamasi vakili.
Germaniya kansleri koronavirusga qarshi emlanish uchun ro‘yxatdan o‘tib, so‘ng uni bekor qilgani xabar berilmoqda. 1954-yil 17-iyulda tug‘ilgan (kanslerning ma’lumotlari bilan bir xil) Angela Merkel ismli bemor 11-aprel, yakshanba kuniga emlanish uchun yozilgan (u yozilgan vaksinatsiya markazida AstraZeneca kompaniyasi vaksinasi qo‘llaniladi), ammo maxsus portal orqali yozuvni bekor qilgan. Bild nashri kansler Xristian-demokratik ittifoqi va Xristian-sotsialistik ittifoqi blokining yopiq majlisi tufayli emlanish uchun borolmaganini yozmoqda.
Izoh (0)