Xitoyning Xiaomi korporatsiyasi o‘zining birinchi avtomobilini taqdim etgandi. Bu “g‘ildiraklar ustidagi uy” bo‘lib, uning ichidan yotoqxona, oshxona va sanuzel o‘rin olgan. “Korrespondent.net”ning yozishicha, kompaniya rahbariyati ushbu avtomobilni seriyali ishlab chiqarishni tasdiqlagan.
“Xiaomi dunyodagi har bir inson istalgan vaqtda va istalgan joyda progressiv hayot kechirishiga imkon beradigan sifatli ‘aqlli’ elektromobillarni ishlab chiqarishni davom etishga umid qiladi”, — deydi IT-gigant asoschisi va bosh direktori Leo Szyun.
Elektrokar korporatsiya mijozining buyurtmasiga asosan uch oy davomida yaratilgan.
Shu bilan birga, kompaniya avtomobil ishlab chiqarishga ixtisoslashgan filiali ochilishini e’lon qilgan bo‘lib, Xiaomi unga o‘n yil davomida 10 milliard dollar investitsiya kiritadi. Mashina o‘rta va yuqori sinf iste’molchilari uchun mo‘ljallangan.
Ammo korporatsiya mashinalar kuzovining tipi — sedan yoki yo‘ltanlamas bo‘lishi borasida bir to‘xtamga kelmagan. Hozirda Xiaomi’ning iste’mol auditoriyasi tomonidan beriladigan ovoz berish jarayonlari natijasi kutilmoqda. Xiaomi rahbarining ma’lum qilishicha, mashinalar narxi 15—45 ming dollar oralig‘ida bo‘ladi.
Eslatib o‘tamiz, 2020-yilning aprelida Xiaomi korporatsiyasi o‘z avtomobilini yaratgani to‘g‘risida xabar berilgandi. Biroq shuncha kutilganiga qaramay, bu to‘laqonli mashina emas, balki Suzuki Jimny modelining 1:16 masshtabda kichraytirilgan o‘yinchoq modeli bo‘lib chiqqandi. 2021-yilning martida Xiaomi o‘z avtomobilini yaratish ustida ish boshlagani va bunga mas’ul etib kompaniya vitse-prezidenti Van Chuan tayinlangani ma’lum bo‘lgan edi.
Izoh (0)