Elektron qurilmalarni ishlab chiqarish bilan shug‘ullanuvchi Xiaomi kompaniyasi o‘zining birinchi avtomobilini taqdim etdi — u g‘ildiraklar ustidagi uy. Ikkita slaytdan iborat taqdimot uch soatli translyatsiyaga aylangan, uning davomida Xitoy kompaniyasi o‘zining yangiligi haqida so‘zlab bergan, deb xabar beradi Motor.

Kadr: YouTube

Xiaomi Group bosh direktori Ley Szyun kemper haqida batafsil ma’lumotlarni oshkor qilmagan. Uning so‘zlariga ko‘ra, mashina marka ixlosmandlaridan biri uchun yagona nusxada yig‘ilgan. U Yangi yilga dunyo bo‘ylab sayohat qilish mumkin bo‘lgan Xiaomi’ning “aqlli uy”i uchun mo‘ljallangan qurilmalari bilan to‘ldirilgan avtomobilga ega bo‘lishni xohlagan.

Xiaomi muhandislari jamoasi mashinani yaratish ustida uch oy ishlagan. Szyun avtomobil bazasini nima tashkil etishiga aniqlik kiritmagan, ko‘rinishidan u SAIC kompaniyasi tomonidan ishlab chiqariladigan Maxus V90 mikroavtobusiga o‘xshaydi. Original V90 161 ot kuchini taqdim etishga qodir ikki litrli dizel motor bilan jihozlangan.

“Xiaomi yaratadigan birinchi avtomobili g‘ildiraklar ustidagi uy bo‘ladi deb hech qachon o‘ylamagandim”, — deydi Ley Szyun.

Kadr: YouTube

Avtomobilning yashash uchun mo‘ljallangan moduli turli elektronika vositalari, jumladan, Xiaomi tomonidan “aqlli uy” uchun yaratilgan ko‘plab gadjetlar bilan boyitilgan. Ular orasida konditsioner, havo tozalagich, qahva qaynatgich, choynak, shuningdek, keng formatli televizor va noutbuk ham bor.

Xiaomi g‘ildiraklar ustidagi “aqlli uy”ni seriyali ishlab chiqarishni yo‘lga qo‘yish-qo‘ymasligi noma’lum.

Eslatib o‘tamiz, 2020-yilning aprelida Xiaomi korporatsiyasi o‘z avtomobilini yaratgani to‘g‘risida xabar berilgandi. Biroq shuncha kutilganiga qaramay, bu to‘laqonli mashina emas, balki Suzuki Jimny modelining 1:16 masshtabda kichraytirilgan o‘yinchoq modeli bo‘lib chiqqandi. 2021-yilning martida Xiaomi o‘z avtomobilini yaratish ustida ish boshlagani va bunga mas’ul etib kompaniya vitse-prezidenti Van Chuan tayinlangani ma’lum bo‘lgan edi.