Хитойнинг Xiaomi корпорацияси ўзининг биринчи автомобилини тақдим этганди. Бу «ғилдираклар устидаги уй» бўлиб, унинг ичидан ётоқхона, ошхона ва санузел ўрин олган. «Korrespondent.net»нинг ёзишича, компания раҳбарияти ушбу автомобилни серияли ишлаб чиқаришни тасдиқлаган.
«Xiaomi дунёдаги ҳар бир инсон исталган вақтда ва исталган жойда прогрессив ҳаёт кечиришига имкон берадиган сифатли ‘ақлли’ электромобилларни ишлаб чиқаришни давом этишга умид қилади», — дейди IT-гигант асосчиси ва бош директори Лео Цзюнь.
Электрокар корпорация мижозининг буюртмасига асосан уч ой давомида яратилган.
Шу билан бирга, компания автомобиль ишлаб чиқаришга ихтисослашган филиали очилишини эълон қилган бўлиб, Xiaomi унга ўн йил давомида 10 миллиард доллар инвестиция киритади. Машина ўрта ва юқори синф истеъмолчилари учун мўлжалланган.
Аммо корпорация машиналар кузовининг типи — седан ёки йўлтанламас бўлиши борасида бир тўхтамга келмаган. Ҳозирда Xiaomi’нинг истеъмол аудиторияси томонидан бериладиган овоз бериш жараёнлари натижаси кутилмоқда. Xiaomi раҳбарининг маълум қилишича, машиналар нархи 15—45 минг доллар оралиғида бўлади.
Эслатиб ўтамиз, 2020 йилнинг апрелида Xiaomi корпорацияси ўз автомобилини яратгани тўғрисида хабар берилганди. Бироқ шунча кутилганига қарамай, бу тўлақонли машина эмас, балки Suzuki Jimny моделининг 1:16 масштабда кичрайтирилган ўйинчоқ модели бўлиб чиққанди. 2021 йилнинг мартида Xiaomi ўз автомобилини яратиш устида иш бошлагани ва бунга масъул этиб компания вице-президенти Ван Чуан тайинлангани маълум бўлган эди.
Изоҳ (0)