Rossiyaning Irkutsk shahrida qiyin ahvolda qolgan ona va uning voyaga yetmagan farzandi O‘zbekistonga sog‘-salomat yetib oldi. Bu haqda “Dunyo” xabar berdi.
Ma’lum qilinishicha, O‘zbekiston Bosh konsulxonasi va Migratsiya agentligi vakolatxonasi hamkorligida Rossiyaning Irkutsk shahrida tang ahvolda qolgan ona va uning voyaga yetmagan farzandining vatanga yetib olishiga amaliy yordam ko‘rsatildi.
Ayolning so‘rovi asosida unga va farzandiga O‘zbekistonda 30-iyuldan 30-avgustgacha e’lon qilingan “Vatanga qaytarish” loyihasi doirasida Irkutsk-Toshkent yo‘nalishidagi aviareysga chipta olib berildi.
Vatandoshlar 15-avgust kuni Uzbekistan Airways aviakompaniyasi reysi bilan O‘zbekistonga kuzatib qo‘yildi.
O‘zbekistonda joriy yil 30-iyuldan 30-avgustgacha “Vatanga qaytarish” xayriya gumanitar aksiyasi amalga oshirilmoqda. Aksiya doirasida Saudiya Arabistonida oilaviy zo‘ravonlik qurboni bo‘lgan o‘zbekistonlik vatanga qaytarilgan edi.
“Vatanga qaytarish” xayriya aksiyasidan chet ellarda og‘ir sharoitda qolgan o‘zbekistonliklarni vatanga qaytarish maqsad qilingan. Rejaga asosan, avvalo Turkiya, Rossiya, Qozog‘iston, BAA, Saudiya Arabistoni, Hindiston, AQSH va Koreyadagi deportatsiya markazlarida bo‘lib turgan ayollar va bolalar vatanga qaytariladi.
Xorijda og‘ir moliyaviy ahvolda qolgan fuqarolar konsullik muassasalari yoki Migratsiya agentligi vakolatxonalari xulosasi asosida O‘zbekistonga olib kelinadi. Vatanga qaytarilgan fuqarolarni samarali reintegratsiya qilish bo‘yicha amaliy choralar ko‘riladi. Ular davlat tomonidan taqdim etilayotgan maqsadli subsidiyalar, imtiyozli kreditlar, tadbirkorlik va o‘zini o‘zi band qilish dasturlari orqali qo‘llab-quvvatlanadi.
Fuqarolarni qaytarish bilan bog‘liq transport xarajatlari Migratsiya jamg‘armasi mablag‘lari hisobidan qoplanadi.
Maʼlum qilinishicha, elchixona va konsulliklar 7-avgustgacha chet davlatlar deportatsiya markazlaridagi o‘zbekistonlik fuqarolarni aniqlaydi. Keyin ro‘yxatni Migratsiya agentligiga taqdim etadi.
15-avgustgacha shaxsiy maʼlumotlari yetarli bo‘lmaganlar uchun zarur hujjatlarni tayyorlab, ikkinchi ro‘yxatni agentlikka yuboradi.
Migratsiya agentligi taqdim etilgan ro‘yxat asosida 1–3 ish kuni ichida aviachiptalarni xarid qiladi.
Fuqaro migratsiya agentligiga to‘g‘ridan to‘g‘ri murojaat qilsa, agentlik xodimlari 1–2 soat ichida u bilan bog‘lanadi. Hujjatlarni masofaviy qabul qiladi. Arizani bir kun ichida ko‘rib chiqib, ikki kun muddatda yo‘l chipta bilan taʼminlaydi.
Mahalliy hokimliklar, Bandlik vazirligi, Oila va xotin-qizlar qo‘mitalari, vatanga qaytarilgan fuqarolarni ruhiy, ijtimoiy va iqtisodiy moslashtirish ishlarini amalga oshiradi.
Izoh (0)