Jo Bayden Tramp joriy qilgan sanksiyalarning bir qismini bekor qildi

Jo Bayden ma’muriyati AQShning sobiq prezidenti Donald Tramp tomonidan kiritilgan Xalqaro jinoiy sudga (XJS) nisbatan sanksiyalar va viza cheklovlarini bekor qildi. Bu haqda Davlat departamentining matbuot xizmatiga tayanib, “RBK” xabar berdi.

Xabarda davlat kotibi Entoni Blinken nomidan aytilishicha, Bayden yuqoridagi cheklovlarni bekor qilishni nazarda tutuvchi qarorni imzoladi. “Natijada oldingi ma’muriyat tomonidan XJS prokurori Fatu Bensuda va yurisdiksiya, o‘zaro amaliyot va hamkorlik bo‘limi rahbari Fakiso Mochochokoga qarshi kiritilgan sanksiyalar bekor qilindi”, — deyiladi xabarda.

Shuningdek, Davlat departamenti XJS xodimlari uchun viza cheklovlarini olib tashladi. “Ushbu qarorlar ko‘rilgan choralar noo‘rin va samarasiz bo‘lgani haqidagi fikrimizni ifodalaydi”, — dedi Blinken.

Shu bilan birga, AQSh avvalgidek XJSning Afg‘oniston va Falastinga nisbatan munosabatini ma’qullamaydi, deb ta’kidladi Blinken. Shuningdek, u sud bilan sanksiyalarni emas, balki ziddiyatli masalalarda muloqot qilish yo‘lini yanada samarali deb topdi.

2020-yilning yozida Tramp XJSga nisbatan sanksiyalar kiritdi. U imzolagan farmonda XJSning harakatlari AQSh suverenitetiga hamda Rim statutini qo‘llab-quvvatlamaydigan va XJS yurisdiksiyasini qabul qilmaydigan ittifoqchilariga tahdid solishi aytilgan.

Trampning qarorini izohlar ekan, uning davlat kotibi Mayk Pompeo AQSh hukumati “adolat haqida safsata sotuvchi” tashkilotning amerikaliklarga tahdid qilishiga yo‘l qo‘ymasligini ta’kidlagan.

Xalqaro jinoiy sud 1998-yil joriy qilingan Rim statuti qoshida tashkil etilgan, lekin o‘z ishini rasman 2002-yilning 1-iyulidan boshlagan. Sud mustaqil xalqaro tashkilot maqomiga ega, BMT tarkibiga kirmaydi. U Gaaga shahrida (Niderlandiya) joylashgan. Ayni vaqtda XJS yurisdiksiyasi Rim statutiga a’zo bo‘lgan va tasdiqlagan 123 ta mamlakat tomonidan tan olingan. Rossiya 2000-yilning 13-sentabr kuni Rim statutiga a’zo bo‘lgan, lekin sud ishlarida kuzatuvchi sifatida qatnashib, unga hech qachon qonuniy vakolat bermagan.

Avvalroq Yevropa Ittifoqidan so‘ng AQSh, Kanada va Buyuk Britaniya Shinjon-Uyg’ur muxtor viloyatidagi uyg‘urlar huquqlarini buzgani uchun Xitoy rasmiylariga qarshi sanksiyalar kiritgani haqida xabar berilgandi.  AQSh Xitoydagi Shinjon qurilish va ishlab chiqarish korpusi bilan bog‘liq kompaniyalardan paxta hamda tekstil mahsulotlarining importiga taqiq qo‘ydi.

Shuningdek, Jo Bayden Eronga qarshi sanksiyalar muddatini bir yilga uzaytirishga qaror qildi.