Tayvanda relsdan chiqib ketib, halokatga uchragan poyezdning ichida 496 kishi bo‘lgan, ulardan 146 nafari jarohat olgan, 51 kishi, jumladan, Fransiya fuqarosi vafot etgan. Bu haqda Tayvan transport va kommunikatsiyalar vazirining o‘rinbosari Van Gosay 2-aprel kuni o‘tkazilgan matbuot anjumanida ma’lum qildi, deb yozmoqda “RIA Novosti”.
“Poyezdda 496 kishi, xususan, 492 yo‘lovchi, mashinist, mashinist yordamchisi, farrosh va poyezd menejeri bo‘lgan”, — dedi Van Gosay.
Uning so‘zlariga ko‘ra, “halok bo‘lganlarning yakuniy tasdiqlangan soni 51 kishini tashkil etadi, ular orasida bir nafar Fransiya fuqarosi, mashinist, mashinist yordamchisi bor, 146 nafar jarohat olganlarga kerakli yordam ko‘rsatilmoqda, ba’zilari uyiga ketgan”.
Avvalroq TVBS telekompaniyasi hodisa oqibatida taxminan 54 kishi halok bo‘lgani va 156 kishi jarohat olgani, shuningdek, voqea sodir bo‘lgan paytda poyezdda 350 ga yaqin odam bo‘lgani haqida xabar bergan.
Eslatib o‘tamiz, Tayvanning Xualyan uyezdida 2-aprel kuni mahalliy vaqt bilan 09:28 (Toshkent vaqti bilan 06:28)da yo‘lovchi poyezdi izidan chiqib ketdi. Tayvan shimolidagi Sinbey shahridan orolning janubi-sharqidagi Taydung tomon ketayotgan Taroko Express poyezdida sakkizta vagon bor edi. Uchinchisidan oxirigacha tunnel ichida qolgan vagonlar qidiruv-qutqaruv ishlariga qiyinchilik tug‘dirdi.
“Pingo jibao” nashri yozishicha, dastlabki ma’lumotlarga qaraganda, relsga 20 metr balandlikdan qiyalikka noto‘g‘ri parkovka qilingan yuk mashinasi tushib ketgan, uning tormozlari nosoz bo‘lgan.
Reuters ushbu temir yo‘l halokatini Tayvanda so‘nggi 40 yil ichidagi eng yirigi deb atamoqda. So‘nggi marta Tayvanda yirik temir yo‘l halokati 2018-yil oktabrida sodir bo‘lgan, o‘shanda Puyuma Express tezyurar poyezdi Ilan uyezdida izidan chiqib ketgan edi. Oqibatda 22 kishi halok bo‘lgan, 170 dan ortiq odam jarohat olgan edi. 1981-yilda poyezd halokati oqibatida 31 kishi qurbon bo‘lgandi.
Izoh (0)