Жо Байден маъмурияти АҚШнинг собиқ президенти Дональд Трамп томонидан киритилган Халқаро жиноий судга (ХЖС) нисбатан санкциялар ва виза чекловларини бекор қилди. Бу ҳақда Давлат департаментининг матбуот хизматига таяниб, «РБК» хабар берди.
Хабарда давлат котиби Энтони Блинкен номидан айтилишича, Байден юқоридаги чекловларни бекор қилишни назарда тутувчи қарорни имзолади. «Натижада олдинги маъмурият томонидан ХЖС прокурори Фату Бенсуда ва юрисдиксия, ўзаро амалиёт ва ҳамкорлик бўлими раҳбари Факисо Мочочокога қарши киритилган санкциялар бекор қилинди», — дейилади хабарда.
Шунингдек, Давлат департаменти ХЖС ходимлари учун виза чекловларини олиб ташлади. «Ушбу қарорлар кўрилган чоралар ноўрин ва самарасиз бўлгани ҳақидаги фикримизни ифодалайди», — деди Блинкен.
Шу билан бирга, АҚШ аввалгидек ХЖСнинг Афғонистон ва Фаластинга нисбатан муносабатини маъқулламайди, деб таъкидлади Блинкен. Шунингдек, у суд билан санкцияларни эмас, балки зиддиятли масалаларда мулоқот қилиш йўлини янада самарали деб топди.
2020 йилнинг ёзида Трамп ХЖСга нисбатан санкциялар киритди. У имзолаган фармонда ХЖСнинг ҳаракатлари АҚШ суверенитетига ҳамда Рим статутини қўллаб-қувватламайдиган ва ХЖС юрисдиксиясини қабул қилмайдиган иттифоқчиларига таҳдид солиши айтилган.
Трампнинг қарорини изоҳлар экан, унинг давлат котиби Майк Помпео АҚШ ҳукумати «адолат ҳақида сафсата сотувчи» ташкилотнинг америкаликларга таҳдид қилишига йўл қўймаслигини таъкидлаган.
Халқаро жиноий суд 1998 йил жорий қилинган Рим статути қошида ташкил этилган, лекин ўз ишини расман 2002 йилнинг 1 июлидан бошлаган. Суд мустақил халқаро ташкилот мақомига эга, БМТ таркибига кирмайди. У Гаага шаҳрида (Нидерландия) жойлашган. Айни вақтда ХЖС юрисдиксияси Рим статутига аъзо бўлган ва тасдиқлаган 123 та мамлакат томонидан тан олинган. Россия 2000 йилнинг 13 сентябрь куни Рим статутига аъзо бўлган, лекин суд ишларида кузатувчи сифатида қатнашиб, унга ҳеч қачон қонуний ваколат бермаган.
Аввалроқ Европа Иттифоқидан сўнг АҚШ, Канада ва Буюк Британия Шинжон-Уйғур мухтор вилоятидаги уйғурлар ҳуқуқларини бузгани учун Хитой расмийларига қарши санкциялар киритгани ҳақида хабар берилганди. АҚШ Хитойдаги Шинжон қурилиш ва ишлаб чиқариш корпуси билан боғлиқ компаниялардан пахта ҳамда текстиль маҳсулотларининг импортига тақиқ қўйди.
Шунингдек, Жо Байден Эронга қарши санкциялар муддатини бир йилга узайтиришга қарор қилди.
Изоҳ (0)