Eron yadroviy kelishuviga a’zo davlatlar AQShning ushbu bitimga qaytishiga yordam bermoqchiligini ma’lum qildi. Bu haqda Yevropa Ittifoqi tashqi siyosati xizmatining Qo‘shma komissiya yig‘ilishi yakunlari bo‘yicha bayonotida e’lon qilindi, deb yozadi “RBK”.
Xabarga ko‘ra, yadro shartnomasi bo‘yicha muzokaralar kelasi hafta Avstriya poytaxti Venada bo‘lib o‘tadi. Muzokaralar davomida “sanksiyalarni bekor qilish va yadroviy majburiyatlarni bajarish” singari kelishuvni amalga oshirish bo‘yicha choralarni belgilab olish kutilmoqda. “Shu munosabat bilan koordinator Venada qo‘shma harakat rejasining barcha ishtirokchilari AQSh bilan individual aloqalarni kuchaytiradi”, — deyiladi Yevroittifoqning tashqi siyosat xizmatida.
AQSh Venadagi muzokaralarda vositachilar orqali ishtirok etish rejalarini tasdiqladi. “AQSh Davlat departamenti hozircha Eron bilan to‘g‘ridan to‘g‘ri muzokaralarga umid bog‘lamaydi, ammo bu imkoniyatga ochiq bo‘lib turibdi”, — deydi departament vakili.
Eron yadro dasturi bo‘yicha keng qamrovli qo‘shma harakatlar rejasi bo‘yicha Qo‘shma komissiya yig‘ilishi 6-aprel kuni kunduzi Venadagi siyosiy direktorlar darajasida bo‘lib o‘tadi”, — dedi Rossiyaning Venadagi xalqaro tashkilotlardagi doimiy vakili Mixail Ulyanov “RIA Novosti”ga. Uning so‘zlariga ko‘ra, muzokaralar AQShning yadroviy kelishuvga qaytishi bo‘yicha “masalani ekspertiza asosida o‘rganish”ni o‘z ichiga oladi.
Ma’lumot uchun, 2015-yilda AQSh, Fransiya, Buyuk Britaniya, Germaniya, Xitoy, Rossiya va Eron yadro dasturi bo‘yicha qo‘shma harakatlarni imzolagan edi. Shartnomaga binoan, Tehronning yadro qurolidan voz kechishi evaziga mamlakatlar unga qarshi sanksiyalarni qo‘llamaslikka va’da berdi. 2018-yilda Donald Tramp davrida Qo‘shma Shtatlar Eronni kelishuvni buzganlikda ayblab, shartnomadan chiqdi va unga qarshi sanksiyalarni qayta tikladi. Tehron, o‘z navbatida, kelishuvning ayrim shartlarini bajarishdan bosh tortdi.
Bloomberg AQShning yangi prezidenti Jo Bayden ma’muriyati yadroviy kelishuvni qayta tiklashga qadam qo‘yish niyatidaligini aytgandi. Shu bilan birga, Vashington Tehronga qarshi sanksiyalardan hali voz kechmoqchi emas, ammo unga Xalqaro valyuta fondidan olingan kreditlar va COVID-19’ga qarshi kurashish uchun gumanitar yordam ko‘rsatish haqida o‘ylamoqda, deb xabar beradi agentlik manbalari. Eron rasmiylari, o‘z navbatida, sanksiyalarni bekor qilishni talab qilmoqda.
Avvalroq Eron AQShning Tehronga qarshi sanksiyalari bekor qilinmaguncha uranni boyitish darajasini 20 foizdan tushirmasligini ma’lum qilgandi. “Uranning 20 foizga boyitilishi yadroviy bitimning 36-bandiga mos keladi va agar AQSh barcha sanksiyalarni bekor qilsagina, bu foiz pasaytiriladi”, — dedi hukumat vakili.
Shuningdek, Yevropa Ittifoqining doimiy vakillari qo‘mitasi Eronda inson huquqlarining poymol qilinish holatlari kuzatilgan deb gumon qilgan holda sakkiz nafar jismoniy va uch yuridik shaxsga nisbatan cheklov choralarini qo‘llash haqida qaror chiqardi. Sanksiyalar Yevroittifoq kengashi tomonidan rasman tasdiqlanganidan keyin, yaqin kunlar ichida kuchga kiradi. Cheklovlar Eronda 2019-yilda bo‘lib o‘tgan norozilik namoyishlarini ayovsiz bostirish bilan bog‘liq harakatlar sabab joriy qilinadi.
Izoh (0)