Ukraina prezidenti Vladimir Zelenskiy 2020-yilda 22,7 million grivna (hozirgi kurs bo‘yicha, taxminan, 815 ming dollar) ishlab topdi. Bu haqda Ukraina prezidenti devoni e’lon qilgan daromadlar deklaratsiyasida ma’lumot berildi, deb yozmoqda “RBK”.
2019-yilda Zelenskiy 1,06 million dollardan ortiq daromadini deklaratsiya qilgan edi. Shunday qilib, bir yilda uning daromadi deyarli to‘rtdan bir qismga kamaydi.
Yangi deklaratsiyaga ko‘ra, Zelenskiy Kiyev yaqinidagi Ivankovichi qishlog‘idagi ko‘chmas mulk va yerlarning sotuvidan 13,5 million grivna (taxminan, 485 ming dollar) miqdorida daromad olgan. Prezidentning yillik maoshi esa 36 ming grivnani (12 ming dollar) tashkil qilgan.
Shuningdek, Zelenskiy 4,6 million grivna (165 ming dollar) miqdoridagi royalti daromadlarini (patentlar va mualliflik huquqlaridan foydalanish uchun kompensatsiya) ham deklaratsiya qilgan. 2020-yilda Zelenskiy Ukraina hududidagi ko‘chmas mulklari ijarasidan 2,6 million grivna (95 ming dollar) daromad olgan. Bundan tashqari, u ichki davlat qarzlari bo‘yicha depozitlar va obligatsiyalardan 442 ming grivna (15 ming dollar) miqdoridagi ulushga ega bo‘lgan.
Zelenskiyning turmush o‘rtog‘i Yelena esa 2020-yilda 953 900 grivna (34 ming dollar) maosh va royalti daromadlarini olgan.
“Zelenskiy yangi ko‘chmas mulk — davlat dala hovlisini deklaratsiya qildi, u yerga davlatning majburiy himoyasini ta’minlash zarurati bilan bog‘liq vaziyatlarda ko‘chib o‘tish mumkin”, — deyiladi xabarda.
Shuningdek, deklaratsiyaga ko‘ra, Zelenskiy bir qator savdo belgilarining egasi bo‘lib qolmoqda. 2020-yilda u Ukrainada 13 ta, chet elda ikkita savdo markasini ro‘yxatdan o‘tkazdi. Prezident matbuot xizmatining yozishicha, ularni ro‘yxatdan o‘tkazish Zelenskiyning davlat rahbari lavozimiga saylanishidan oldin boshlangan.
Korrupsiyaning oldini olish milliy agentligi saytida e’lon qilingan Zelenskiylar oilasining deklaratsiyasiga ko‘ra, Kiyevda prezidentning bir nechta kvartirasi va avtoturargohlari bor. Turmush o‘rtog‘i Yelena esa Qrim hududida 129,8 kvadrat metrli kvartiraga egalik qiladi (Qrim 2014-yilda Rossiya tarkibiga kirgan bo‘lsa-da, deklaratsiyada ushbu mulk Ukraina hududida joylashgan deb ko‘rsatilgan). Shuningdek, Zelenskiylar juftligi Buyuk Britaniyada ham kvartira ijaraga beradi.
Zelenskiyning qimmatbaho buyumlaridan Breguet, Tag Heuer, Rolex brendlarining qo‘lsoatlari, Yelenaning esa Bovet va Breguet qo‘lsoatlari, shuningdek, Graff brendiga tegishli ziraklari va brilliant uzuklari deklaratsiya qilingan.
Prezidentning 2016-yilda ishlab chiqarilgan Land Rover avtomobili bor, uning xotini esa 2014-yilda ishlab chiqarilgan Mercedes-Benz S500 markasi haydaydi. Prezident oilasining bank hisob raqamlarida 4,7 million grivna (168 ming dollar), 125 ming dollar va 10 ming yevrodan ortiq pul mablag‘lari saqlanadi.
Prezident va birinchi xonimning 5 million grivnadan (179 ming dollar) ortiq obligatsiyalari bor. Yelena Zelenskaya Aldorante Limited (Kipr), Film Heritage Inc. (Beliz) va San Tommaso S.R.L. (Italiya) kabi kompaniyalarda benefitsiar (foyda oluvchi) hisoblanadi. Zelenskiy foydali modellar va ixtirolarning patentlariga, shuningdek, tovar belgilarining mualliflik huquqlariga ega.
2020-yilda Zelenskiyning maoshi uning devoni rahbari Andrey Yermaknikidan kamroq bo‘ldi. Uning daromadlar deklaratsiyasiga ko‘ra, u 2020-yilda 444,5 ming grivna (16 ming dollar) ishlab topgan. Yermak bir qator yuridik shaxslarni boshqaradi va bir nechta jamoat tashkilotlarining ham a’zosi hisoblanadi. Uning 107,8 kvadrat metr maydonga ega kvartirasi bor. 2020-yilda Mercedes-Benz S-Class 350 d 4MATIC L avtomobilini sotib oldi.
Avvalroq Ukrainada uchta telekanal yopib qo‘yilgach, “Muxolifat platformasi — Hayot uchun” partiyasi raisdoshi Vadim Rabinovich Oliy Rada minbarida turib, prezident Vladimir Zelenskiyga nisbatan impichment jarayoni boshlanishini ma’lum qildi. Bunga prezidentning “112”, ZiK va NewsOne telekanallariga qarshi sanksiyalar kiritish qarori sabab bo‘ldi.
Ma’lumot uchun, Fransiyaning sobiq prezidenti, ilgari korrupsiyada ayblanib sudlangan Nikolya Sarkozi yana sudga tortilishi haqida xabar berildi, bu safar u 2012-yilgi saylovoldi kampaniyasini noqonuniy moliyalashtirish va firibgarlikda ayblanmoqda. Xabarga ko‘ra, Sarkozining muvaffaqiyatsizlikka uchragan saylovoldi kampaniyasida mitinglar va tarafdorlar bilan uchrashuvlarning haddan ortiq dizayni uchun sarflangan pullar limitdan 24 million dollarga oshib ketgan.
Belarus prezidenti Aleksandr Lukashenko esa internetda joylashtirilgan uning hashamatli hayoti va boylikka intilishi haqidagi filmni yolg‘on, uydirma deb atadi.
Izoh (0)