Braziliya Federal Oliy sudi sobiq prezident Luis Inasiu Lula da Silvaga qarshi korrupsiya ishi bo‘yicha ayblov hukmini bekor qildi. Bu haqda Tengrinews xabar berdi.

Natijada sobiq prezident 2022-yilda mamlakatda bo‘lib o‘tadigan prezidentlik saylovlarida yana ishtirok etish imkoniyatiga ega bo‘ladi. Biroq xabarda aytilishicha, Bosh prokuratura sudning hukmini bekor qilish haqidagi qarori ustidan shikoyat qilmoqchi.

Braziliya Oliy sudi sobiq prezidentni aybdor deb topgan Kuritiba sudiga qarorga qarshi shikoyatni amalga oshirish vakolatini bermadi. Shuning uchun da Silvaning korrupsiya ishi federal okrug sudi tomonidan ko‘rib chiqilishi kerak.

Eslatib o‘tamiz, Braziliyaning sobiq prezidenti Luis Inasiu Lula da Silva korrupsiya va “pul yuvish”da ayblanib, ozodlikdan mahrum etilgan edi.

2018-yilda Braziliya Oliy sudi sudyasi Edson Fakin sobiq prezidentni qamoqqa olish to‘g‘risidagi qaroriga qarshi apellyatsiya shikoyatini rad etgan, shundan so‘ng da Silva taslim bo‘lgan va jazosini Kuritiba shahrida o‘tay boshlagan. 2018-yil yanvar oyida Lula da Silva korrupsiya uchun 12 yil 1 oyga ozodlikdan mahrum etilgandi.

75 yoshli siyosatchi 2019-yilda bir necha bor sud hukmi ustidan shikoyat qilganidan keyin ozod qilingan. U jinoiy ishi sababli saylovda ishtirok etolmadi. Sobiq prezident korrupsiyaga oid ayblovlarni bir necha bor rad etib, prokurorlarni uning davlat rahbarligiga qaytishiga to‘sqinlik qilganlikda aybladi.

Ma’lumot uchun, Lula da Silva 2003—2011-yillarda Braziliyaga prezidentlik qilgan.

Avvalroq Qirg‘izistonning sobiq bosh vaziri Sapar Isoqov korrupsiyada ayblanib 18 yilga, Qirg‘izistonning sobiq prezidenti Almazbek Atambayev katta ta’sirga ega bo‘lgan jinoyatchi Aziz Batukayevni qamoqdan ozod qilish bo‘yicha korrupsiyada aybdor deb topilib, 11 yilga ozodlikdan mahrum qilingani haqida xabarlar berilgandi.

Shuningdek, Fransiyaning sobiq bosh vaziri Fransua Fiyon davlat mablag‘larini talon-toroj qilgani uchun besh yilga ozodlikdan mahrum etilgan.