Meksikaning Nichupte orolida yaqin orada tug‘iladigan farzandining jinsi haqidagi ma’lumot yozilgan ulkan banner bilan parvoz qilishi kerak bo‘lgan va bayram uchun Xomex kompaniyasidan ijaraga olingan Cessna 206 samolyoti kutilmaganda suvga quladi. Bu haqda Insider xabar bergan.
Halokat tasvirga tushirilgan videoda mehmonlarning hozir chaqaloqning jinsi haqida ma’lumot yozilgan banner paydo bo‘lishi haqida baqirayotgani va keyinchalik samolyotning suvga qulab tushayotgani, hodisa oqibatida sarosima boshlangani aks etgan.
La Prensa Latino nashri bergan axborotga ko‘ra, halokat oqibatida ikki nafar odam halok bo‘lgan, ularning biri qutqaruv operatsiyasi vaqtida, yana biri esa birinchi tez tibbiy yordam ko‘rsatilayotgan paytda vafot etgan. Samolyot bortida jami 4 nafar odam bo‘lgan.
Fuqaro aviatsiyasining federal agentligi kutilmaganda sodir bo‘lgan, sirli fojia yuzasidan tergov harakatlari va halokat sabablarini aniqlashtirish bo‘yicha surishtiruv ishlarini boshlab yuborgan.
2020-yil sentabr oyida Kaliforniyada yangi tug‘iladigan chaqaloq jinsini e’lon qilish maqsadida uyushtirilgan ziyofat vaqtida katta yong‘in sodir bo‘lgandi. O‘shanda bo‘lajak ota-ona pirotexnika vositalaridan foydalanishi oqibatida park hududidagi qurigan maysalar yonib ketgan. Hodisa oqibatida 4 ming gektar maydon yongan, ziyofat oqibatida yuzaga kelgan zararning miqdori esa 9 million AQSh dollariga baholangandi. Hodisadan keyin juftlik haqidagi mem-suratlar ijtimoiy tarmoqlarni portlatgan.
Izoh (0)